Қазақстан Республикасы Еңбек және халықты әлеуметтік қорғау министрлігі Мемлекеттік еңбек инспекциясы комитетінің Жамбыл облысы бойынша департаменті

Жазатайым жағдайларды жасыру фактілері орын алған болса; Қазақстан Республикасының Әкімшілік құқық бұзушылық туралы кодексінің 96-бабының 1-тармағына сәйкес, еңбек қызметіне байланысты жазатайым оқиға фактісі туралы хабарламау: шағын кәсiпкерлiк субъектiлерiне немесе коммерциялық емес ұйымдарға – жетпіс, орта кәсіпкерлік субъектілеріне – бір жүз бес, iрi кәсiпкерлiк субъектiлерiне бір жүз қырық айлық есептік көрсеткіш мөлшерiнде айыппұл салуға әкеп соғады. Қазақстан Республикасының еңбек кодексінің 187-бабының 2-тармағына сәйкес, жұмыс беруші еңбек қызметіне байланысты жазатайым оқиға туралы бір тәулік ішінде еңбек жөніндегі уәкілетті мемлекеттік орган белгілеген нысан бойынша аумақтық бөлімшеге хабарлауға міндетті.

Қазақстан Республикасының еңбек кодексінің 182-бабының 2-тармағының 4) тармақшасына сәйкес: жұмыс беруші жұмыскерлерге қажетті санитариялық-гигиеналық жағдайлар жасауға, еңбек жөніндегі уәкілетті мемлекеттік орган белгілеген нормаларға сәйкес жұмыскерлердің арнайы киімі мен аяқкиімін беруді және жөндеуді, оларды профилактикалық өңдеу, жуу және дезинфекциялау құралдарымен, медициналық қобдишамен, сүтпен немесе бірдей тамақ өнімдерімен және (немесе) диеталық (емдік және профилактикалық) тамақтануға арналған арнайы өнімдермен, жеке және ұжымдық қорғаныш құралдарымен жабдықтауды қамтамасыз етуге міндетті. Қазақстан Республикасының Әкімшілік құқық бұзушылық туралы кодексінің 93-бабының 3-тармағына сәйкес, қызметкерлерді Қазақстан Республикасының еңбек заңнамасының талабына сәйкес емдік-профилактикалық тағаммен, жеке және ұжымдық қорғану құралдарымен қамтамасыз етпеу ескерту жасауға әкеп соғады.

Қазақстан Республикасының еңбек кодексінің 77-бабының 1-тармағына сәйкес, үстеме жұмыс осы баптың 2-тармағында көзделген жағдайларды қоспағанда, үстеме жұмыстарға тартуға жұмыскердің жазбаша келісімімен ғана жол беріледі. Қазақстан Республикасының Әкімшілік құқық бұзушылық туралы кодексінің 87-бабының 3-тармағына сәйкес, Қазақстан Республикасы еңбек заңнамасының үстеме жұмысқа, мереке және демалыс күндеріндегі жұмысқа ақы төлеу, сондай-ақ түнгі уақыттағы еңбекке ақы төлеу жөніндегі талаптарын бұзу: лауазымды адамдарға–отыз, шағын кәсіпкерлік субъектілеріне немесе коммерциялық емес ұйымдарға – алпыс, орта кәсіпкерлік субъектілеріне – сексен, ірі кәсіпкерлік субъектілеріне бір жүз жиырма айлық есептік көрсеткіш мөлшерінде айыппұл салуға әкеп соғады.

Тәртіптік жазаларды белгілеу және қолдану мерзімдерімен қолдану тәртібі Қазақстан Республикасының еңбек кодексінің 65 және 66-баптарында көрсетілген. Егер, тәртіптік жазаларды қолдану тәртібі бұзылса,жұмыс берушінің тәртіптік жаза қолдану туралы актісін күшін жоюға алып келеді.

Қазақстан Республикасының еңбек кодексінің 93-бабының 1 және 2-тармақтарына сәйкес, жұмыскерлерге жыл сайынғы ақы төленетін еңбек демалысын берудің кезектілігі жыл сайын жұмыс беруші жұмыскерлер пікірін ескере отырып бекітетін демалыстар кестесіне сәйкес айқындалады не тараптардың келісімі бойынша демалыстар кестесінен тыс белгіленеді. Демалыстар кестесі өндірістік қажеттілікке байланысты өзгертілген жағдайда, жұмыс беруші бұл туралы жұмыскерге еңбек демалысы басталардан кемінде екі апта бұрын хабардар етуге міндетті.

Қазақстан Республикасының еңбек кодексінің 113-бабының 1 тармағына сәйкес, жалақы Қазақстан Республикасының ұлттық валютасында ақшалай нысанда белгіленеді және келесі айдың бірінші онкүндігінен кешіктірілмей айына бір реттен сиретпей төленеді деп көрсетілген. Егер, Сіздің айлық жалақыңызды төлеу барысында заң талаптары бұзылған жағдайда, Мемлекеттік еңбек инспекциясы департаментіне жүгіне аласыз. Бұл жағдайда Департамент өз тарапынан жоспардан тыс тексеру жүргізіп, жұмыс берушіні Қазақстан Республикасының Әкімшілік құқық бұзушылық туралы кодексінің 87- бабының 1-тармағына сәйкес, жауапкершілікке тартатын болады.