Мойынқұм тұрғындары қысқы отын мәселесін көтерді

Қыс қамы — ауыл тұрғындары үшін қазір ең маңызды шаруалардың бірі. Мойынқұм ауылының жұртшылығы аудан әкімі Ермек Карентаевпен кездесуде көмір мен сексеуілге қатысты сауалдарын жеткізіп, қысқы маусымға қажетті отынмен қамтылу мәселесіне назар аударды.

Тұрғындардың өтініштері жауапты бөлім басшыларының қатысуымен талқыланды. Ермек Карентаев көтерілген мәселелерге тоқталып, оларды шешу жолдарын бірлесе қарастырды. Әңгіме барысында ауылда атқарылған жұмыстар мен алдағы даму жоспарлары да сөз болды. Сондай-ақ жиын барысында тозығы жеткен көпірлер мәселесі де көтерілді.

Кездесуден кейінгі жұмыстың бағыты да айқындалды: тұрғындар айтқан ұсыныстар нақты іс-шаралар жоспарына енгізілуі тиіс. Аудан басшысы бұл міндетті ауыл әкіміне жүктеп, жоспардың орындалуын қадағалауды тапсырды.

Жұртшылық өз өтінішінің қалай қаралып жатқанынан хабардар болуы қажет. Осыған байланысты Ермек Карентаев атқарылатын жұмыстардың барысын тұрғындарға жүйелі түрде жеткізіп, халықпен тұрақты байланыс орнатудың маңызын атап өтті.