Ақбақай тұрғындарының талабы — жол жөндеу сапасына мән беру

Ақбақай мен Мирный арасындағы 100 шақырымдық тасжолды толықтай күрделі жөндеуден өткізу және ағымдағы жөндеу жұмыстарын сапалы жүргізу. Ақбақай тұрғындары аудан әкімінің орынбасары Алибек Нурадиновпен кездесуде осы талаптарын жеткізді.

Ауыл жұртшылығы жолдың нашар жағдайы күнделікті қатынасқа қиындық туғызатынын айтып, мәселені шешу қажеттігіне назар аударды. Тұрғындар үшін жөндеудің жүргізілуімен қатар, оның сапалы болуы да маңызды.

Алибек Нурадинов жолға қатысты атқарылып жатқан жұмыстар жөнінде түсініктеме беріп, тұрғындардың сауалдарына жауап берді. Кездесуде ауылдық округте орындалған жұмыстар мен алдағы даму жоспарлары да талқыланды.

Жиын қорытындысы бойынша ауылдық округ әкіміне айтылған ұсыныстарды нақты іс-шаралар жоспарына енгізіп, орындалуын қадағалау тапсырылды. Жоспарланған жұмыстардың барысы туралы халықты жүйелі түрде хабардар етіп отыру міндеті де жүктелді.

Аудан әкімінің орынбасары тұрғындармен тұрақты кері байланыс орнатудың маңызын атап өтті. Бұл ауыл жұртшылығына өз өтініштерінің қаралу барысын біліп, атқарылып жатқан жұмыстар жөнінде уақтылы ақпарат алуға мүмкіндік береді.