Мойынқұмда Республика күні салтанатты түрде аталып өтті

Елдік мерекенің мерейін асырған әуен, адал еңбекке көрсетілген құрмет, жұртшылықтың ақжарма тілегі. Мойынқұм ауылындағы мәдениет үйінде 25 қазан – Республика күніне арналған салтанатты шара өтті.

Аудан әкімі Ермек Карентаев Мойынқұм жұртшылығын ұлттық мерекемен құттықтап, елдің береке-бірлігін сақтаудың, туған жердің өркендеуі жолында бірлесе еңбек етудің маңызын атап өтті. Республика күні – мемлекеттілігімізді ұлықтап, өткенге тағзым ететін, болашақ алдындағы жауапкершілігімізді сезінетін қастерлі мереке.

Салтанатты жиында ауданның дамуына үлес қосып, өз саласында адал еңбегімен көзге түскен азаматтар марапатталды. Бұл құрмет – туған өлкенің игілігі үшін атқарылған істің, табандылық пен жауапкершіліктің бағасы. Мойынқұмның әр жетістігінің артында осындай еңбек адамдарының маңдай тері жатыр.

Шараның екінші бөлімі мәдениет үйі өнерпаздарының мерекелік концертіне ұласты. Әуелеген әндер мен әсем билер көпшілікке көтеріңкі көңіл күй сыйлап, салтанатты кештің сәнін келтірді. Өнерпаздар өз өнерлері арқылы туған елге деген сүйіспеншілік пен ұлттық рухты дәріптеді.

Тәуелсіз еліміздің тұғыры берік, жұртымыздың бірлігі бекем болсын! Республика күні әр шаңыраққа қуаныш пен құт-береке әкелсін!