«Салауатты университеттер» жобасы аясында студенттермен кездесу өтті

Жастардың денсаулығы көбіне студенттік кезеңде қалыптасатын әдеттерге байланысты. Тамақтану, дене белсенділігі, толыққанды ұйқы және өз денсаулығына мұқият қарау адамның жұмысқа қабілеттілігіне, көңіл күйіне және өмір сапасына әсер етеді. Сондықтан денсаулықты күту студенттердің күнделікті өмірінің ажырамас бөлігіне айналуы маңызды.

Осы тақырыпқа Ш. Уәлиханов атындағы Көкшетау университетінің студенттерімен «Салауатты университеттер» жобасы аясында ұйымдастырылған кездесу арналды.

Кездесуде Ақмола облысының санитариялық-эпидемиологиялық бақылау департаментінің бас маманы Аим Бейсембаева спикер ретінде сөз сөйледі. Ол жобаның негізгі мақсаттары мен міндеттері, оның жастар денсаулығын сақтаудағы маңызы, сондай-ақ университеттерде пайдалы әдеттерді қалыптастыруға ықпал ететін қолайлы орта құру туралы айтып берді.

Кездесу барысында студенттердің денсаулығына кері әсер етуі мүмкін факторлардың алдын алуға ерекше назар аударылды. Оқу жүктемесінің көптігі, күйзеліс, ұйқының жеткіліксіздігі және уақытылы тамақтанбау студенттік өмірде жиі кездеседі. Ал күн тәртібін сақтау, теңгерімді тамақтану және тұрақты дене белсенділігі өзін жақсы сезінуге, күш-қуатты сақтауға және күнделікті жүктемені жеңіл еңсеруге көмектеседі.

Аим Бейсембаева денсаулыққа қамқорлық жасау күнделікті қабылданатын шешімдерден басталатынын атап өтті. Күн сайын жүйелі түрде орындалатын қарапайым әрекеттер ұзақ жылдар бойы денсаулықты сақтауға және өзін жақсы сезінуге ықпал ететін пайдалы әдеттерді қалыптастырады.

Айта кетейік, «Салауатты университеттер» жобасы денсаулықты нығайту мәселелеріне ерекше көңіл бөлінетін білім беру ортасын қалыптастыруға бағытталған. Жобаны іске асыру студенттердің, оқытушылардың және жоғары оқу орындары әкімшілігінің салауатты өмір салтына қолайлы жағдай жасауға, жастардың аурулардың алдын алу туралы хабардарлығын арттыруға және өз денсаулығына жауапкершілікпен қарауын қалыптастыруға қатысуын көздейді.