1 / 6
Ақмола облысының санитариялық-эпидемиологиялық бақылау департаментінде 2026 жылдың 9 айының қорытындысы бойынша алқа отырысы өтті. Отырыс онлайн форматта аумақтық басқармалардың басшылары мен департамент қызметкерлерінің қатысуымен ұйымдастырылды.
Отырыс барысында есепті кезеңдегі қызметтің қорытындылары шығарылып, өңірдегі эпидемиологиялық жағдай, санитариялық-эпидемиологиялық бақылау нәтижелері және алдағы кезеңге арналған негізгі міндеттер талқыланды.
Жұқпалы аурулардың таралу динамикасы, халықты профилактикалық егумен қамту деңгейі және инфекциялардың таралуын болдырмау шаралары талданды. Сондай-ақ вакцинацияны уақтылы жүргізу және профилактикалық жұмыстың тиімділігін арттыру мәселелері қаралды.
Талқылаудың тағы бір бағыты денсаулық сақтау, білім беру және сумен жабдықтау объектілерінде санитариялық талаптардың сақталуына арналды. Қатысушылар бақылау-қадағалау қызметінің нәтижелерін, анықталған бұзушылықтарды және оларды жою үшін қабылданып жатқан шараларды талқылады.
Қызметтің негізгі бағыттарымен қатар, алқа отырысында қызметтік әдепті сақтау мәселесі де көтерілді. Әдеп жөніндегі уәкіл Сауле Садвакасова әдеп бұзушылықтарының алдын алу және лудоманияның профилактикасы туралы баяндама жасады. Ол мемлекеттік қызметшілердің жауапты мінез-құлқын қалыптастырудың, кәсіби беделін сақтаудың және ойынға тәуелділікке байланысты тәуекелдердің алдын алудың маңыздылығын атап өтті.
Отырысты қорытындылай келе, департамент басшысы Серик Омарханов алдағы кезеңге арналған басым міндеттерді белгіледі. Ол эпидемиологиялық бақылауды күшейту, профилактикалық іс-шараларды жүргізу, бақылаудағы объектілерде санитариялық талаптардың сақталуын қамтамасыз ету және мемлекеттік көрсетілетін қызметтердің сапасын арттыру қажеттігіне назар аударды.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
