Алматы облысында полицейлер қашуға әрекеттенген жүргізушіні тоқтату үшін көліктің дөңгелегіне оқ атты. Кейін көлік тізгінінде жүргізуші куәлігі жоқ кәмелетке толмаған жасөспірім болғаны анықталды.
Жарияланым авторының айтуынша, жүргізуші полициядан қашпақ болған, ал тәртіп сақшылары оны тоқтату үшін көліктің дөңгелегіне оқ атқан.
Бейнежазбада екі полицей көлікке жүгіріп барып, есігін ашпақ болғаны, бірақ жүргізуші қозғалысты жалғастырғаны көрінеді.
"Табельдік қару қолданылды": полиция не деді?
Алматы облыстық полиция департаменті оқиға Іле ауданы, Жайнақ ауылында болғанын хабарлады.
"Көлікті жүргізуші куәлігінсіз басқарған кәмелетке толмаған жасөспірім полиция қызметкерлерінің тоқтау туралы заңды талабын елемей, жол қозғалысының басқа қатысушыларына қауіп төндіріп, қозғалысын жалғастырған", – деп хабарлады ПД өкілдері.
Көлікті тоқтату үшін полицейлер табельдік қару қолданған.
"Автокөлікті мәжбүрлі түрде тоқтату үшін полицейлер табельдік атыс қаруын қолданып, көлік дөңгелегіне оқ атты, содан кейін көлік тоқтатылды", – деп түсіндірді полиция.
Жасөспірім көлікті шамдарын өшіріп айдағанын және өзге жүргізушілерге қауіп төндіргенін айтты. Полицейлердің сөзінше, ол жол-көлік оқиғасына себепкер болуы мүмкін еді.
Оқиғадан кейін полиция баланы тәрбиелеу бойынша міндеттерін орындамағаны үшін жасөспірімнің әкесін әкімшілік жауапкершілікке тартты.
Қазір оқиғаның барлық мән-жайы анықталып жатқанын атап өтті.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
