Департамент басшысы К.Ауанасова, лицензиялау бөлімінің басшысы С.Пахымбеттің қатысуымен алдағы жылдан бастап енгізілетін мектепке дейінгі ұйымдарды мемлекеттік лицензиялауға қойылатын талаптар бойынша даярлау бағытында Түлкібас ауданында кезекті кездесу өтті.
Кездесуге, сондай-ақ аудандық білім бөлімінің басшылығы, төтенше жағдайлар басқармасы, санитариялық-эпидемиологиялық қызмет, Білім беруді дамыту орталығының өкілдері мен балабақша басшылары қатысты.
Жиында лицензия алудың негізгі талаптары, «E-лицензиялау» жүйесі арқылы өтініш беру тәртібі, құжаттарды рәсімдеу, сондай-ақ өрт қауіпсіздігі мен санитариялық нормаларды сақтау мәселелері түсіндірілді.
Ашық пікір алмасу барысында балабақша басшылары дайындық кезінде кездесетін қиындықтарды ортаға салып, нақты жауаптар мен практикалық ұсынымдар алды.
Басты мақсат – әрбір мектепке дейінгі ұйымның лицензиялауға жан-жақты дайын болуын қамтамасыз ету және балалар үшін қауіпсіз әрі сапалы білім беру ортасын қалыптастыру.
Осы бағыттағы ақпараттық-түсіндіру жұмыстары өңірдің өзге аудандарында да жалғасын табуда.
