«АЛТЫН КҮЗ – 2026» МЕРЕКЕСІ АТАЛЫП ӨТТІ

Күзгі жиын-терім аяқталып, дала еңбегінің жемісі сараланатын шақта Ордабасы ауданында дәстүрлі «Алтын күз – 2026» мерекесі аталып өтті. Молшылықты дәріптеген шарада ауыл шаруашылығы еңбеккерлерінің еңбегі ұлықталып, саланың жылдық қорытындысы жарияланды.
Орталық алаңда ауыл шаруашылығы өнімдерінің жәрмеңкесі мен көрмесі ұйымдастырылып, киіз үйлер тігіліп, жергілікті шаруалардың өнімдері көпшілікке ұсынылды. Ордабасы өнімдерінен әзірленген көркем композициялар мерекенің сәнін келтірді.
Аудан әкімі Азат Оралбаев қонақтармен бірге ауыл шаруашылығы техникалары, асыл тұқымды мал шаруашылықтары мен жергілікті өнімдер көрмесін аралады. Ал театрландырылған «Алтын күз» шеруінде бидай мен мақта бейнесіндегі киім киген өнерпаздар ән мен биден шашу шашып, мерекеге ерекше көрік берді.
Салтанатты жиында аудан әкімі биылғы 9 айдың қорытындысына тоқталды. Ауыл шаруашылығының жалпы өнім көлемі 63 млрд теңгеге жетіп, өткен жылдың сәйкес кезеңімен салыстырғанда 7,2 млрд теңгеге артқан. Диқандар 71 512 гектар алқаптан 382 752 тонна өнім жинаса, негізгі капиталға салынған инвестиция көлемі 15,2 млрд теңгені құрады. Су үнемдеу технологиялары енгізіліп, 135 жаңа тезникамен толықты. Мал шаруашылығы мен жылыжай саласында да өсім бар.
Аудан басшысы бұл нәтижелер шаруалардың табанды еңбегінің жемісі екенін атап өтіп, ауыл шаруашылығын жаңғырту мен өндіріс көлемін арттыру бағытындағы жұмыстар жалғасын табатынын жеткізді.
Мерекеде сала үздіктері назардан тыс қалмады. Жылыжай шаруашылығы, мал бордақылау, мақта, жүгері, астық және құс шаруашылығы бағыттарында жоғары нәтиже көрсеткен ауыл округтері марапатталды. Ал агроөнеркәсіп кешенін дамыту көрсеткіштері бойынша І орынды Төрткүл, ІІ орынды Қажымұқан, ІІІ орынды Шұбарсу ауыл округтері иеленді. Сондай-ақ бірқатар еңбек озатына республикалық марапаттар мен Алғыс хаттар табысталды.
Мерекелік бағдарлама қазақша күрес пен ұлттық спорт ойындарына ұласып, аудан өнерпаздары мен «Шабыт» би тобы өнер көрсетті. Кештің арнайы қонағы, аудан тумасы Әділет Жауғашар әннен шашу шашты.
«Алтын күз» – жыл бойғы еңбектің бағасын беріп, ел ырысын еселеген шаруаларға құрмет көрсететін берекелі мереке. Биылғы думан да Ордабасыдағы ауыл шаруашылығының әлеуетін айқындап, еңбек пен молшылықтың мерейін асырды.
Ордабасы ауданы әкімінің баспасөз қызметі