ЕЛДІК РУХЫН ҰЛЫҚТАҒАН МЕРЕКЕ

⚜️Республика күніне орай өткен салтанатты жиында ел дамуына үлес қосқан азаматтар марапатталып, ұлттық өнер мен рухани құндылықтар дәріптелді.
⚜️Ордабасы ауданында 25 қазан – Республика күніне арналған салтанатты іс-шара өтті. Ұлттық мереке аясында бас қосқан жұртшылық елдіктің қадірін ұлықтап, туған жердің өркендеуіне үлес қосып жүрген азаматтарға құрмет көрсетті.
⚜️Мерекелік жиын Мемлекеттік Әнұранмен басталды. Аудан әкімі Азат Оралбаев жиналған қауымды Республика күнімен құттықтап, бұл мерекенің ел тарихындағы айрықша орнына тоқталды. Тәуелсіздікті тұғырлы ету, бірлікті бекемдеу және ел игілігі жолындағы еңбекті бағалау – ортақ міндет екенін атап өтті.
⚜️Салтанатты шарада ауданның әлеуметтік-экономикалық дамуына, мәдениеті мен руханиятының өркендеуіне елеулі үлес қосқан азаматтар марапатталды. Елдің дамуы күнделікті адал еңбекпен өлшенеді. Сондықтан туған жерге қызмет етіп жүрген жандарға көрсетілген құрмет мерекенің маңызын арттыра түсті.
⚜️Мерекелік алаңда суретшілер мен оқушылардың шығармашылық туындылары қойылып, кітапхана ұйымы әзірлеген көрме көпшілік назарына ұсынылды. Мерекелік концертте аудандық мәдениет үйінің өнерпаздары, Амангелді атындағы жалпы орта мектептің оқушыларының әуезді әндері, «Шаттық» би ансамблінің мың бұралған билері, аудандық «Өнер» мектебінің халық аспаптар ансамблі мен филармония әншілері өнер көрсетті. Патриоттық әндер шырқалып, күмбірлеген күйлер мен әсем билер көрерменге көтеріңкі көңіл күй сыйлады.
⚜️Кештің ерекше сәттерінің бірі – композитор Жарылқасын Дәулеттің орындауындағы «Ордабасым» әні болды. Құрманәлі Жылқыбайдың сөзіне жазылған туынды туған жерге деген сүйіспеншілікті әуенмен өріп, ордабасылықтардың жүрегіне жол тартты.
⚜️Республика күні – мемлекеттілігімізді айқындап, тәуелсіздігіміздің мәнін терең сезіндіретін маңызды мереке.
⚜️Ордабасыдағы мерекелік жиын елдік мұратты ұлықтап, еңбек адамдарына құрмет көрсеткен, ұлттық өнер мен руханиятты тоғыстырған тағылымды шара болды.
Ордабасы ауданы әкімінің баспасөз қызметі