ОРДАБАСЫ АУДАНЫНЫҢ ӘКІМІ АЗИЯ ОЙЫНДАРЫНЫҢ ЖҮЛДЕГЕРЛЕРІН ҚАБЫЛДАДЫ!

Ордабасы ауданының әкімі Азат Оралбаев Жапонияның Айчи–Нагоя қалаларында өткен Азия ойындарында ел намысын абыроймен қорғап, күміс жүлдеге қол жеткізген жерлестеріміз – дзюдошы Ғұсман Қырғызбаев пен ауыр атлет Нұрғиса Әділетұлын арнайы қабылдап, құрмет көрсетті.
Халықаралық додада жоғары шеберлік пен қайсарлық танытқан қос саңлағымыз Қазақстан қоржынына екі күміс медаль салып, туған жердің абыройын асқақтатты. Бұл жетістік – ел спортының мерейін өсірген айтулы жеңіс әрі барша Ордабасы жұртшылығы үшін зор мақтаныш.
Кездесу барысында аудан басшысы спортшыларды жарқын жетістіктерімен құттықтап, олардың қажырлы еңбегі мен табандылығы өскелең ұрпаққа үлгі екенін атап өтті. Сондай-ақ алдағы халықаралық жарыстарда биік белестерді бағындырып, ел мерейін асқақтата берулеріне тілектестік білдірді.
Салтанатты қабылдауда қос спортшыға арнайы естелік сыйлықтар табысталып, ерекше құрмет көрсетілді. Сонымен қатар, ел игілігі жолындағы игі бастамаларға қолдау білдіріп жүрген халық жанашыры Әбілда Аманбекұлы мен Қол күрестен төрт дүркін әлем чемпионы Қыдырғали Дүйсенбекұлы Оңғарбаевтың қолдауымен демеушілер есебінен спортшыларға қаржылай сыйақылар берілді.
Бұл – ел намысын қорғап, халықаралық аренада жоғары жетістікке жеткен азаматтарға көрсетілген шынайы құрмет пен туған жерге деген жанашырлықтың жарқын көрінісі.
Өз кезегінде спортшылар көрсетілген құрмет пен қолдау үшін аудан басшылығына, демеушілерге және барша жерлестеріне алғыстарын білдірді.
Ел абыройын асқақтатып, туған жердің мерейін үстем еткен қос саңлағымызға алдағы жарыстарда толағай табыс пен жаңа жеңістер тілейміз!
🇰🇿 ОРДАБАСЫ – ЧЕМПИОНДАР МЕКЕНІ!
Ордабасы ауданы әкімінің баспасөз қызметі