Өндірістік жарақат деп қызметкердің еңбек міндеттерін орындау кезінде алған және еңбекке қабілеттілігінен айырылуына әкеп соққан денсаулығының зақымдануы танылады.
Мұндай жағдайларда медициналық-әлеуметтік сараптама (МӘС) жүргізу тәртібі Қазақстан Республикасы Еңбек және халықты әлеуметтік қорғау министрінің 2023 жылғы 29 маусымдағы № 260 бұйрығымен бекітілген Қағидаларға сәйкес жүзеге асырылады.
Өндірістік жарақат алған кезде азамат ең алдымен қажетті емдеу-диагностикалық іс-шаралардан өту үшін медициналық ұйымға жүгінуі қажет.
Егер уақытша еңбекке жарамсыздық төрт ай бойы сақталса, дәрігерлік-консультациялық комиссия (ДКК) азаматты медициналық-әлеуметтік сараптамаға жіберуге негіздердің бар-жоғын қарайды. Тиісті негіздер болған жағдайда МӘС-тен өту үшін № 031/е нысаны бойынша қорытынды ресімделеді.
Өндірістік жарақат алған кезде маңызды құжаттардың бірі еңбек қызметіне байланысты жазатайым оқиға туралы акт болып табылады. Жұмыс істейтін азаматтар үшін уақытша еңбекке жарамсыздық парағы да қажет.
