«Заң және тәртіп»: №8 мекемесінде жас қызметкерлермен кездесу өтті

2026 жылғы 20 қазанда Ақтөбе облысы бойынша Қылмыстық-атқару жүйесі департаментінің №8 мекемесінде «Заң және тәртіп» қағидатын іске асыру аясында жас қызметкерлермен кездесу ұйымдастырылды. Іс-шараға мекеменің жас қызметкерлері және ата-аналары, қылмыстық-атқару жүйесінің ардагерлері мен өзіндік қауіпсіздік тобының қызметкері қатысты. Кездесудің негізгі мақсаты – жас қызметкерлер арасында құқық бұзушылықтардың алдын алу, қызметтік тәртіп пен заңдылықты сақтау, сыбайлас жемқорлыққа қарсы мәдениетті қалыптастыру және қызметтік міндеттерді орындау барысында жоғары жауапкершілік таныту қажеттігін түсіндіру. Кездесу барысында өзіндік қауіпсіздік тобының қызметкері қызметкерлер тарапынан орын алуы мүмкін құқық бұзушылықтардың алдын алу, заң талаптарын қатаң сақтау және қызметтік әдеп нормаларын ұстану мәселелері бойынша түсіндіру жұмыстарын жүргізді. Өз кезегінде қылмыстық-атқару жүйесінің ардагерлері көпжылдық қызметтік тәжірибелерімен бөлісіп, жас мамандарға кәсіби адалдық, жауапкершілік, тәртіп пен адамгершілік қасиеттердің маңыздылығын атап өтті. Іс-шара аясында мекеме бастығының атынан жас қызметкерлердің ата-аналарына алғыс хаттар табысталды. Бұл – балаларына саналы тәрбие беріп, бойларына адалдық пен жауапкершілік қасиеттерін сіңіріп, олардың құқық қорғау саласында қызмет етуіне қолдау көрсеткен ата-аналарға деген құрметтің белгісі. Осындай кездесулер жас қызметкерлердің кәсіби қалыптасуына ықпал етіп, аға буын мен жас ұрпақ арасындағы сабақтастықты нығайтуға, қызметтік тәртіпті арттыруға және құқық бұзушылықтардың алдын алуға бағытталған маңызды шаралардың бірі болып табылады.