Медициналық-әлеуметтік сараптамадан қалай өтуге болады?
Мүгедектікті белгілеу тәртібі және медициналық-әлеуметтік сараптамадан (МӘС) өту жолдары туралы жиі қойылатын сұрақтардың бірі – азаматқа қандай қадамдар жасау қажет?
Бірінші кезекте не істеу керек?
Медициналық-әлеуметтік сараптамадан өту үшін азамат тұрғылықты жері бойынша медициналық ұйымға жүгінуі қажет. Емдеуші дәрігер қажетті тексерулерді ұйымдастырып, азаматтың денсаулық жағдайын бағалайды.
Медициналық тексерулердің нәтижелері бойынша медициналық-әлеуметтік сараптамаға жіберу туралы мәселені дәрігерлік-консультациялық комиссия (ДКК) қарайды. Медициналық көрсетілімдер мен қолданыстағы талаптар болған жағдайда азамат МӘС-ке жолданады.
Медициналық-әлеуметтік сараптама қалай жүргізіледі?
МӘС Қазақстан Республикасы Премьер-Министрінің орынбасары – Еңбек және халықты әлеуметтік қорғау министрінің 2023 жылғы 29 маусымдағы № 260 бұйрығымен бекітілген Медициналық-әлеуметтік сараптама жүргізу қағидаларына сәйкес жүзеге асырылады.
Сараптама барысында медициналық құжаттар қаралып, денсаулық жағдайы, ағза функцияларының бұзылуы және адамның тыныс-тіршілігінің шектелу дәрежесі бағаланады.
Бағалау нәтижелері бойынша мүгедектікті белгілеу немесе белгілемеу, мүгедектік тобы мен мерзімін айқындау, сондай-ақ қажетті әлеуметтік қорғау шаралары мен оңалту ұсынымдарын анықтау мәселелері шешіледі.
МӘС-ті сырттай өтуге бола ма?
Иә. Заңнамада көзделген жағдайларда медициналық-әлеуметтік сараптама азаматтың медициналық құжаттары негізінде сырттай форматта жүргізілуі мүмкін. Бұл ретте шешім ұсынылған медициналық құжаттар мен қолданыстағы талаптарға сәйкес қабылданады.
Медициналық-әлеуметтік сараптаманың негізгі мақсаты – адамның денсаулық жағдайын, функционалдық шектеулерін және әлеуметтік қорғау мен оңалту шараларына қажеттілігін кешенді бағалау.
Есте сақтаңыз: медициналық-әлеуметтік сараптамаға жолдау мәселесі медициналық тексеру нәтижелері мен белгіленген тәртіпке сәйкес қаралады.
