Елордада скутер жүргізушісі жол қозғалысы ережелерін бұзды

Астанада полиция қызметкерлері Кенесары көшесіндегі филармония ғимаратының кіреберісі маңындағы скверде жол қозғалысы ережелерін бұзған кәмелетке толмаған скутер жүргізушісін анықтады.
Оқиға орнына келген полицейлер құқық бұзушылық фактісін растады. Мемлекеттік тіркеу нөмірлік белгілері жоқ скутерді басқарған кәмелетке толмаған жүргізуші тоқтау туралы талапты елемей, бой тасалауға әрекеттенген.
Кенесары көшесімен қозғалысын жалғастырған ол Сарыарқа даңғылына бұрылған. Сарыарқа даңғылы мен Абай көшесінің қиылысында жүргізуші полиция қызметкерлерінің күшімен мәжбүрлі түрде тоқтатылып, ұсталды.
Кәмелетке толмаған баланың заңды өкіліне көлік құралын басқару құқығы жоқ адамға басқаруға бергені үшін ҚР ӘҚБтК-нің 612-бабының 5-бөлігі бойынша әкімшілік хаттама толтырылды. Кәмелетке толмаған жасөспіріммен профилактикалық әңгіме жүргізілді.
Скутер коммуналдық мамандандырылған айыппұл тұрағына қойылды.
Полиция департаменті жүргізушілерге жол қозғалысы ережелерін қатаң сақтауды, қажетті тіркеу құжаттарының болуын және полиция қызметкерлерінің заңды талаптарын орындауды ескертеді.