Астаналық полицейлер оқушыларға діни ақпаратты дұрыс қабылдау және жалған ақпараттан сақтану жолдарын түсіндірді

Астана қаласындағы Төлеген Айбергенов атындағы №16 жалпы білім беретін мектепте діни ақпаратты дұрыс қабылдау, интернеттегі жалған мәліметтерден сақтану және діни экстремизмнің алдын алу тақырыбында профилактикалық кездесу өтті.
Іс-шара барысында Астана қаласы Полиция департаменті Экстремизмге қарсы іс-қимыл басқармасының бөлім бастығы полиция подполковнигі Әбдікәрім Барзуұлы және Астана қаласының Дін істері жөніндегі басқармасына қарасты Qamqor-Astana қоғамдық қорының лекторы Арулан Қуатов оқушылармен кездесу өткізіп, тақырып аясында түсіндіру жұмыстарын жүргізді.
Кездесу барысында оқушыларға интернет пен әлеуметтік желілерде жарияланған ақпараттың барлығы бірдей шынайы емес екені түсіндірілді. Әсіресе діни мазмұндағы мәліметтерді қабылдау кезінде ақпараттың қайдан алынғанына, авторына және сенімді дереккөздер арқылы расталғанына назар аудару қажеттігі айтылды.
Сонымен қатар оқушыларға күмәнді жарияланымдар мен хабарламаларға бірден сенбей, ақпаратты сыни тұрғыдан бағалау, оның шынайылығын тексеру және расталмаған мәліметтерді таратпау керектігі түсіндірілді. Діни тақырыптарды желеу етіп, азаматтардың санасына теріс ықпал етуге бағытталған материалдардан сақ болудың маңыздылығы да атап өтілді.
Лекция соңында оқушылар өздерін қызықтырған сұрақтарын қойып, мамандардан нақты жауаптар алды. Сондай-ақ олар тақырып бойынша ұйымдастырылған сауалнамаға қатысып, өз ойларын білдірді. Мұндай интерактивті формат жастардың тақырыпқа деген қызығушылығын арттырып, алған білімдерін саралауға мүмкіндік берді.
Осындай профилактикалық кездесулердің негізгі мақсаты – жастардың ақпараттық сауаттылығын арттыру, сыни ойлау қабілетін дамыту, діни мәселелерге қатысты дұрыс түсінік қалыптастыру және діни экстремизмнің алдын алу.
Полиция интернеттегі ақпаратқа жауапкершілікпен қарауға, мәліметтерді сенімді дереккөздер арқылы тексеруге және жалған ақпараттың таралуына жол бермеуге шақырады.