Қазақстан Республикасы Стратегиялық жоспарлау және реформалар Агенттігі төрағасының орынбасары Әділ Құсманов Қазақстандағы Халықаралық көші-қон ұйымы (ХКҰ) миссиясының басшысы Серхан Актопракпен кездесу өткізді.
Кездесу барысында тараптар көші-қон деректері мен үдерістерін талдау, олардың әлеуметтік-экономикалық ықпалын бағалау және алынған мәліметтерді мемлекеттік жоспарлау кезінде пайдалану бағыттарындағы ынтымақтастық перспективаларын талқылады.
Қазақстан үшін ішкі және сыртқы көші-қон үрдістерін түсіну еңбек нарығының қажеттіліктерін болжау және өңірлердің әлеуметтік-экономикалық дамуын жоспарлау тұрғысынан маңызды.
Ресми статистиканы халықтың ұтқырлығы туралы қосымша деректермен салыстыру көші-қон үрдістерін болжау, ықтимал теңгерімсіздіктерді анықтау және көші-қон өзгерістерінің ұзақ мерзімді салдарын бағалау үшін пайдаланылатын талдамалық базаны кеңейтуге мүмкіндік береді.
Сондай-ақ кездесу барысында ХКҰ жүргізіп жатқан Еуропалық одақ елдерінің шетелдік студенттер мен жоғары білікті мамандарға қатысты көші-қон заңнамасын талдау мәселесіне ерекше назар аударылды. Таланттарды тарту және елде ұстап қалу тәсілдерін зерделеу Қазақстанның тиімді көші-қон саясатын қалыптастыру және адами капиталды дамыту тұрғысынан маңызды.
Тараптар бұдан әрі өзара іс-қимыл жасау мүмкіндіктері жөнінде де пікір алмасты. Атап айтқанда, бірлескен зерттеулер жүргізу, сараптамалық біліммен алмасу және көші-қонды талдау мен болжау құралдарын жетілдіру кезінде халықаралық тәжірибені пайдалану мәселелері қаралды.
Сонымен қатар тараптар көші-қон мәселелері бойынша елдер арасындағы диалогты дамытуға, тәжірибе алмасуға және ортақ көші-қон міндеттерін шешу тәсілдерін келісуге арналған өңірлік алаңды одан әрі дамыту мүмкіндіктерін талқылады.
Кездесу қорытындысы бойынша тараптар ынтымақтастықтың басым бағыттарын пысықтауға және бірлескен жұмыстың ықтимал нысандарын айқындауға мүдделілік білдірді.
