Төлеби ауданының әкімі Еркеғали Әлімқұловтың 2026 жылдың екінші жартыжылдығына арналған халықпен есепті кездесуі Аққұм ауылдық округінде жалғасты.
Кездесу барысында аудан әкімі Еркеғали Әлімқұлов жыл басынан бері атқарылған жұмыстардың нәтижесіне тоқталып, алдағы кезеңге белгіленген міндеттерді таныстырды. Жиында ауданның әлеуметтік-экономикалық даму көрсеткіштері сараланып, ауылдық округтің тыныс-тіршілігі мен оны одан әрі дамыту бағыттары кеңінен сөз болды. Сондай-ақ ауылдық округ әкімі Қайрат Тәменов 2026 жылдың бірінші жартыжылдығында өткен есепті кездесуде тұрғындар тарапынан көтерілген ұсыныстар мен сауалдардың орындалу барысы жөнінде баяндады. Бұған дейін айтылған талап-тілектердің жүзеге асырылуына қатысты атқарылған жұмыстар сараланды. Аудан әкімі Еркеғали Амантайұлы тұрғындардың ұсыныс-пікірлерін тыңдап, елді мекеннің әлеуметтік ахуалын жақсартуға бағытталған бастамаларға тоқталды. Ауылдың инфрақұрылымын жетілдіру, халыққа көрсетілетін қызметтердің сапасын арттыру және тұрғындардың тұрмыс деңгейін көтеру бағытындағы міндеттердің маңыздылығын атап өтті. Ашық диалог барысында Аққұм тұрғындары ауылдағы ауыз су мәселесін реттеу, жолдардың жай-күйін жақсарту, сондай-ақ елді мекенде пошта бөлімшесін ашу және пошта тасушы маманмен қамтамасыз ету жөнінде ұсыныстарын білдірді. Тұрғындар тарапынан көтерілген әрбір мәселе назарға алынып, жауапты сала басшыларына тиісті тапсырмалар берілді. Сала мамандары қойылған сауалдарға нақты түсініктемелер беріп, мәселелерді шешу жолдарын талқылады. Халықпен есепті кездесулер – елді мекендердің тыныс-тіршілігін бағамдап, тұрғындардың талап-тілегін тікелей тыңдауға және ортақ мәселелердің шешімін бірлесе айқындауға мүмкіндік беретін маңызды алаң. Мұндай ашық пікір алмасу халық пен билік арасындағы өзара байланысты нығайтып, елді мекендердің даму бағыттарын нақтылауға жол ашады. Кездесуден кейін аудан әкімі Еркеғали Амантайұлы азаматтарды жеке мәселелері бойынша қабылдады. Қабылдау барысында тұрғындардың өтініштері мен ұсыныстары тыңдалып, көтерілген мәселелердің шешу жолдары қарастырылды. Әрбір өтініш назарға алынып, жауапты сала басшыларына мәселелерді зерделеп, заңнама аясында шешу бағытында тиісті тапсырмалар берілді.
Төлеби ауданы әкімінің баспасөз қызметі
