Төлеби ауданында Ұстаздар күніне орай білім саласының қызметкерлеріне құрмет көрсетіліп, «Ұстазға құрмет – ұрпаққа өнеге» атты салтанатты іс-шара өтті.
Мерекелік жиынға аудан әкімінің орынбасары Ғалымжан Төлегенов, аудан әкімі аппаратының басшысы Амалбек Өміртай, аудандық мәслихат төрағасы Нұрлан Қойбағаров қатысып, ұстаздар қауымын кәсіби мерекелерімен құттықтады.
«Ұстаз – ұлттың рухани негізін қалыптастырып, жас ұрпақтың бойына біліммен қатар елдік қасиеттерді сіңіретін абыройлы мамандық иесі. Сіздердің шәкірт тәрбиесіне сіңірген еңбектеріңіз бен қоғам дамуына қосқан үлестеріңіз қашанда зор құрметке лайық. Баршаңызды кәсіби мерекелеріңізбен құттықтап, әр шаңыраққа амандық, еңбектеріңізге толағай табыс тілеймін», – деді құттықтау сөзінде аудан әкімінің орынбасары Ғалымжан Қолдасбекұлы. Салтанатты жиында сөз алған Амалбек Дәркенұлы педагогтердің күнделікті еңбегіне тоқталып: «Ұстаздық жол – үлкен жауапкершілік пен үздіксіз ізденісті талап ететін мәртебелі қызмет. Бүгінгі білім беру саласының жетістігі – білікті әрі өз ісіне адал ұстаздардың еңбегінің нәтижесі. Ұжымдарыңызға шығармашылық серпін, кәсіби биіктер және шәкірттеріңіздің әр жетістігінен қуаныш көруді тілеймін», – деді.
Мерекелік жиын барысында білім беру саласында жемісті еңбек етіп жүрген бірқатар ұстазға Қазақстан Республикасы Оқу-ағарту министрлігінің Алғыс хаты, аудан әкімінің Алғыс хаты және аудандық мәслихаттың Грамотасы табысталды.
Мерекелік жиында ұстаздарға арналған арнайы концерттік бағдарлама ұсынылды.
Төлеби ауданы әкімінің баспасөз қызметі
