Төлеби ауданы әкімдігінің кіші мәжіліс залында аудан әкімі Еркеғали Әлімқұловтың төрағалығымен кезекті аппараттық мәжіліс өтті. Жиында ауданның әлеуметтік-экономикалық дамуындағы басым бағыттар сараланып, атқарылған жұмыстардың нәтижелері қаралды. Сонымен қатар алдағы кезеңге арналған міндеттер айқындалып, жауапты сала басшыларына нақты тапсырмалар берілді.
Мәжілістің күн тәртібіне аудан бойынша белгіленген 111 индикаторлық көрсеткіштің орындалу барысы, «Ауыл аманаты» бағдарламасын жүзеге асыру, өндірістік парктер құру және «Таза Қазақстан» республикалық бағдарламасы аясында Төлеби би баба саябағын көгалдандыру мәселелері енгізілді. Алдымен аудандық экономика және қаржы бөлімінің басшысы Мансұр Ашрапов 111 индикаторлық көрсеткіштің орындалу барысы туралы баяндама жасап, негізгі бағыттар бойынша атқарылған жұмыстар мен алдағы міндеттерге тоқталды. Көрсеткіштердің белгіленген межеге сай орындалуын қамтамасыз етуге бағытталған жұмыстарды жүйелі жалғастыру қажеттігі айтылды. Бұдан соң аудандық кәсіпкерлік және ауыл шаруашылығы бөлімінің басшысының орынбасары Рүстем Райымқұлов «Ауыл аманаты» бағдарламасының іске асырылу барысы мен өндірістік парктер құру бағытындағы жұмыстарды баяндады. Аталған бағыттар бойынша жүзеге асырылып жатқан жобалардың аудан экономикасын дамытуға, кәсіпкерлік белсенділікті арттыруға және жаңа өндірістік мүмкіндіктер қалыптастыруға ықпалы атап өтілді. Сонымен қатар қоршаған ортаны абаттандыру және елді мекендердің көркін арттыру мәселесі қаралды. Аудандық мәдениет, тілдерді дамыту, дене шынықтыру және спорт бөлімінің басшысы Әуесбек Әсілбек «Таза Қазақстан» республикалық бағдарламасы аясында Төлеби би баба саябағын көгалдандыру бағытында атқарылып жатқан жұмыстарды таныстырды. Жиынды қорытындылаған аудан әкімі Еркеғали Амантайұлы күн тәртібінде қаралған мәселелердің маңыздылығына тоқталып, жауапты сала басшыларына бірқатар нақты тапсырмалар жүктеді. Атап айтқанда, жылыту маусымын белгіленген мерзімде сапалы ұйымдастырып, оның тұрақты өтуін қамтамасыз етуді, сондай-ақ сел қаупінің алдын алу және су тасқынына қарсы іс-шараларды жүйелі түрде жүргізуді тапсырды.
Аудан басшысы белгіленген міндеттердің сапалы әрі уақытылы орындалуын қамтамасыз етуді, ықтимал қауіптердің алдын алу жұмыстарын күшейтіп, тұрғындардың қауіпсіздігіне қатысты мәселелерді тұрақты бақылауда ұстауды міндеттеді.
Төлеби ауданы әкімінің баспасөз қызметі
