Павлодар облысы бойынша Мемлекеттік кірістер департаменті

Салық кодексінің 55-бабы 2-тармағының 24) тармақшасына сәйкес банк ұйымдары кәсіпкерлік қызметтен табыс алу белгілері анықталған жағдайда жеке тұлғаның банк шотына басқа жеке тұлғалардан түскен ақша қаражатының жиынтық сомасы туралы мәліметтерді ұсынады. Мұндай мәліметтер Қазақстан Республикасы Қаржы министрінің 2025 жылғы 12 қарашадағы № 698 бұйрығымен бекітілген критерийлер бір мезгілде орындалған кезде ғана беріледі. Атап айтқанда, егер жеке тұлға қатарынан үш күнтізбелік айдың әрқайсысында кәсіпкерлік қызметке арналмаған банк шотына 100-ден астам әртүрлі тұлғадан ақша алса және олардың жалпы сомасы ең төменгі жалақының 12 еселенген мөлшерінен асса, банктер бұл туралы мәліметтерді мемлекеттік кірістер органдарына жолдайды.

Жалпыға бірдей декларациялаудың төртінші кезеңінің күші жойылуына және Қазақстан Республикасының жаңа Салық кодексінің қолданысқа енгізілуіне байланысты бұрынғы мемлекеттік қызметшілер үшін декларация тапсыру қағидалары өзгерді. Енді тікелей байланыс жоқ: егер сіз 250.00-нысанды (кіріспе декларацияны) тапсырған болсаңыз, бұл 270.00-нысанды тұрақты негізде тапсыруға міндеттісіз дегенді білдірмейді. Зейнеткерлер үшін декларация тапсыру міндеттілігі кезеңге байланысты. Сіз мемлекеттік қызметте іс жүзінде жұмыс істеген күнтізбелік жыл үшін есеп беруге міндеттісіз. ҚР жаңа Салық кодексінің 415-бабына сәйкес (2017 жылғы Салық кодексінде тәртіп 635-баппен реттелген) декларация ұсыну үшін салықтық есепті кезең оны тапсыратын жылдың алдындағы күнтізбелік жыл болып табылады. Тапсыру мерзімі – есепті жылдан кейінгі жылдың 15 қыркүйегінен кешіктірмей (ҚР жаңа СК 418-бабы). Мемлекеттік қызметті толық тоқтатқаннан және зейнеткерлікке шыққаннан кейін Сізге жыл сайын 270.00-нысанды тапсырудың қажеті жоқ. Алдағы уақытта (ҚР жаңа СК 417-бабына сәйкес) есепті жыл ішінде (31 желтоқсандағы жағдай бойынша) Сізде келесі активтер немесе кірістер пайда болған жағдайда ғана 270.00-нысанды тапсыру міндеті туындайды: - ҚР шегінен тыс жерде тіркелген жылжымайтын мүлік, көлік немесе компаниялардың жарғылық капиталындағы үлес; - шетелдік банктердегі (ҚР шегінен тыс) шоттардағы 1 000 АЕК-тен асатын сомадағы ақша; - жалпы сомасы 20 000 АЕК-тен асатын ірі сатып алулар (жылжымайтын мүлік, көлік, бағалы қағаздар, инвестициялық алтын); - дербес салық салынатын кірістер (мысалы, мүлікті жалға беруден түскен кіріс, жылжымайтын мүлікті сату кезіндегі құн өсімі және т.б.). Егер есепті жылы көрсетілген негіздер туындамаса, декларация ұсыну талап етілмейді.

Егер 910.00 нысанды декларацияда МӘМБ бойынша жолдар автоматты түрде толтырылған болса, салық төлеушінің осы жолдың барлық мәндерін белгілеп, оларды қолмен түзетуге, мысалы, нөлді (0) көрсетуге мүмкіндігі бар.

Әлеуметтік төлемдерді уақтылы немесе толық төлемегені үшін есептелген өсімпұлды бірнеше ыңғайлы тәсілмен төлеуге болады: Екінші деңгейдегі банктердің мобильді қосымшалары арқылы: Halyk: Төлемдер → Барлық төлемдер → Мемлекеттік төлемдер → Өзін-өзі жұмыспен қамтығандар; kz: Мемлекеттік қызметтер / Төлемдер → Айыппұлдар мен салықтар → Өзін-өзі жұмыспен қамтығандарға арналған аударымдар (немесе өсімпұлдарды төлеуге арналған тиісті бөлім). «Қазпошта» АҚ бөлімшелері арқылы. Маңызды: Есептелген өсімпұл сомасын алдын ала « e-Salyq Business» мобильді қосымшасы немесе Салық төлеушінің кабинеті арқылы тексеріп алған жөн. «e-Salyq Business» қосымшасы арқылы әлеуметтік төлемдер мен өсімпұл сомасын тікелей есептен шығару және төлеу жүзеге асырылмайтынын ескеріңіз. Қосымша чектерді қалыптастыру және міндеттемелерді есептеу үшін қолданылады. Төлем белгілеу кодтары (ТБК / КНП) Төлемді жүргізу кезінде төлем белгілеу кодын дұрыс көрсету өте маңызды: - 019 – міндетті зейнетақы жарналары (МЗЖ) бойынша өсімпұл; - 098 – жұмыс берушінің міндетті зейнетақы жарналары (ЖБМЗЖ) бойынша өсімпұл; - 017 – әлеуметтік аударымдар (ӘА) бойынша өсімпұл; - 124 – міндетті әлеуметтік медициналық сақтандыру жарналары (МӘМСЖ) бойынша өсімпұл. Төлемді алушы: «Азаматтарға арналған үкімет» мемлекеттік корпорациясы» КЕАҚ. Мерзімдер мен ставкалар туралы еске саламыз - Өзін-өзі жұмыспен қамтығандар үшін әлеуметтік төлемдердің жалпы мөлшері айлық кірістің 4%-ын құрайды (МЗЖ, ЖБМЗЖ, ӘА және МӘМСЖ үшін 1%-дан). - ЖБМЗЖ 1975 жылға дейін туған азаматтармен төленбейді. - Төлеу мерзімі: табыс алынған айдан кейінгі айдың 25-інен кешіктірілмейді. Есепті айда табыс болмаған жағдайда төлемдер есептелмейді.

Иә, 2026 жылы Сіз өзіңізді жұмыспен қамтып, белгілі бір шарттар орындалған кезде пәтеріңізді, соның ішінде зейнеткер ретінде жалға бере аласыз. Бұл 2026 жылдың 1 қаңтарынан бастап күшіне енетін жаңа Салық кодексінде қарастырылған. Жеке меншік немесе жалға алынған тұрғын үйді жалға беру (қосалқы жалға беру) және басқару өзін-өзі жұмыспен қамтығандарға арналған арнаулы салық режимін қолдануға рұқсат етілген қызмет түрлерінің тізбесіне енгізілген. Өзін-өзі жұмыспен қамтығандар үшін негізгі шарттар: - Сіз Қазақстан азаматы болуыңыз керек; - Жеке кәсіпкер (ЖК) болмауы - өзін-өзі жұмыспен қамтығандар үшін режим тек жеке тұлғаларға ғана қолжетімді; - Қызмет Қазақстан Республикасы Үкіметінің 2025 жылғы 21 қарашадағы № 994 қаулысымен бекітілген өзін-өзі жұмыспен қамтығандар үшін арнаулы салық режимін қолдануға рұқсат етілген қызмет түрлерінің тізбесіне енгізілуге тиіс; - Жалдамалы жұмысшылардың еңбегін пайдаланбау; - Ай сайынғы табыс 300 АЕК-тен аспауы тиіс, бұл шамамен 1 млн. 300 мың теңгені құрайды (2026 жылы 1 АЕК 4325 теңгеге тең болады). Салықтар қалай есептеледі Өзін-өзі жұмыспен қамтығандар табыс салығын төлемейді. Алынған табыстан әлеуметтік төлемдер төленеді - 4%, оған әлеуметтік аударымдар (1%), міндетті зейнетақы жарналары (1%), жұмыс берушінің міндетті зейнетақы жарналары (1%), міндетті әлеуметтік медициналық сақтандыру жарналары (1%) кіреді. Әлеуметтік Кодекстің 243, 248-баптарына, сондай-ақ "Міндетті әлеуметтік медициналық сақтандыру туралы" Заңның 28-бабына сәйкес жасына байланысты зейнеткерлер әлеуметтік аударымдарды, міндетті зейнетақы жарналарын, жұмыс берушінің міндетті зейнетақы жарналарын, міндетті әлеуметтік медициналық сақтандыру жарналарын төлеуден босатылады. Осылайша, Сіз әлеуметтік төлемдерден босатыласыз. Қалай рәсімдеуге болады Өзін-өзі жұмыспен қамтығандар үшін режимі 2026 жылғы 1 қаңтардан бастап «e-Salyq Business» арнайы қосымшасын пайдалануды көздейді. - Мобильді қосымшаға өзін-өзі жұмыспен қамтыған ретінде тіркелу; - Фискалдық чектерді міндетті түрде соғасыз. Режимді қолданудың басталу күні - бірінші чектың соғылуы. - Әлеуметтік аударымдар ай сайын автоматты түрде есептеледі. Өзін-өзі жұмыспен қамтығандар үшін арнаулы салық режимінің қолданылуы Қазақстан Республикасы Салық кодексінің 77-тарауының 718-721-баптарымен реттеледі.

2025 жылдың 18 шілдесінде бекітілген жаңа Салық кодексінің 840-бабына сәйкес қазіргі уақытта арнайы салық режимдерін қолданатын және оңайлатылған декларацияның "жаңа" режиміне көшуді жоспарлап отырған салық төлеушілер 2026 жылғы 1 наурызға дейін қолданылатын салық салу режимі туралы хабарламаны жіберуі керек, әйтпесе олар жалпыға бірдей белгіленген салық режиміне ауыстырылады. Сондай-ақ, патентте немесе арнайы мобильді қосымша арқылы жұмыс істейтін кәсіпкерлердің (таксистер, курьерлер және т.б.) назарын 2026 жылғы 1 наурызға дейін оңайлатылған декларацияның "жаңа" режиміне көшу туралы Мемлекеттік кірістер органдарына қолданылатын салық салу режимі туралы хабарламаны беру қажеттілігі туралы аударамыз. Әйтпесе, олар автоматты түрде жеке кәсіпкер ретінде есептен шығарылады және режим шарттарына сәйкес келсе, өзін-өзі жұмыспен қамтығандар ретінде жұмысын жалғастыра алады.