Тәулік бойы цифрлық бақылау: ШҚО-да бейнекамералардың көмегімен 150 қылмыс ашылды
Бүгінде өңірдегі қауіпсіздік көшелердегі полиция қызметкерлерінің қатысуымен ғана емес, жағдайды бақылауға, талдауға және жедел әрекет етуге мүмкіндік беретін заманауи технологиялардың көмегімен де қамтамасыз етіледі. Шығыс Қазақстан облысында бейнебақылаудың цифрлық жүйелері полиция жұмысының маңызды құралдарының біріне айналды.
2026 жылдың 10 айында бейнебақылау камераларының көмегімен 150 қылмыс ашылып, 23 462 әкімшілік құқық бұзушылық анықталды. Цифрлық жүйелер жол жүрісі қағидаларын бұзудан бастап, ұсақ бұзақылық, қоғамдық орындарда алкогольдік ішімдіктер ішу және абаттандыру қағидаларын бұзу деректеріне дейін түрлі құқық бұзушылықтарды тіркейді.
Бүгінде ШҚО ПД Жедел басқару орталығы мен аумақтық бөлімшелердің кезекші бөлімдеріне 9 000-нан астам бейнекамера қосылған. Олар жедел жағдайды үздіксіз бақылауға, полиция қызметкерлеріне оқиғаларды дер кезінде анықтап, оған қатысы бар адамдарды белгілеуге көмектеседі.
Жұмыстың жеке бір бағыты – адамдарды бет-әлпеті арқылы тану жүйесі. Өскемен қаласында мұндай функциясы бар 300 камера жұмыс істейді. Жыл басынан бері осы жүйенің көмегімен іздеуде жүрген 198 адамның орналасқан жері анықталды.
Цифрлық бақылаудың артында Жедел басқару орталығы қызметкерлерінің күнделікті еңбегі тұр. Олар тәулік бойы хабарламаларды қабылдап, келіп түскен ақпаратты талдайды, жедел жағдайды қадағалап, полиция жасақтарының жұмысын үйлестіреді.
10 ай ішінде «102» пультіне 117 391 хабарлама келіп түскен. Бұл өткен жылдың сәйкес кезеңімен салыстырғанда 20,3%-ға аз.
Қазіргі уақытта полиция көмегіне жүгінудің бірнеше жолы бар. Азаматтар «102» нөміріне қоңырау шала алады, «102» мобильді қосымшасын, Halyk және Kaspi қосымшаларындағы «Заң мен тәртіп» сервисін немесе «SOS дабыл түймесі» жүйесін пайдалана алады.
Цифрландыру қоғамдық тәртіпті қамтамасыз ету тәсілін өзгертуде. Ол ақпаратты жылдам алуға, оқиға орнын нақты анықтауға және полиция жасақтарының жұмысын тиімді ұйымдастыруға мүмкіндік береді. Дегенмен технология – ең алдымен құрал. Ал оның нәтижелі болуы мамандардың кәсібилігіне байланысты.
Сондықтан әрбір дабыл сигналының, тіркелген құқық бұзушылық пен ашылған қылмыстың артында Шығыс Қазақстан облысының тұрғындары мен қонақтарының қауіпсіздігін қамтамасыз ету үшін тәулік бойы қызмет атқаратын полицейлердің үйлесімді жұмысы тұр.
ШҚО ПД баспасөз қызметі
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
