Президент Қасым-Жомарт Тоқаев «Қазақ тілі» қоғамының құрылтайында сөйлеген сөзінде қазақ тілінің мемлекеттік тіл ретіндегі рөлін арттыру, емле ережелерін жүйелеу, сондай-ақ Тәуелсіздік пен Әділетті Қазақстанды құру бағытындағы реформаларға тоқталды.
«Қазақ тілі» қоғамының тарихи рөлі мен еңбегі
Сонау 1989 жылы іргесі қаланған ұйымның Егемен ел тарихындағы орны ерекше. Кезінде көрнекті ғалымдар – академиктер Әбдуәли Қайдар және Өмірзақ Айтбайұлының бастамасымен құрылған ұйымның тарихи жолын бүгінгі буын өкілдері мен тіл мамандары лайықты жалғастырып келеді. Бүгінде ұйым мүшелері көптеген тиімді іс-шараларды, жасампаз жобаларды табысты жүзеге асыруда. Президент ұйымның әр мүшесіне шынайы ризашылығын білдірді.
Тіл – ортақ құндылық және өркениет көрсеткіші
Заңғар жазушы Әбіш Кекілбаевтың «Тіл мерейі – ел мерейі» деген сөзін негізге алған Мемлекет басшысы тілдің адамзат өміріндегі орнына ерекше тоқталды:
«Тіл – баршамызға ортақ құндылық. Тіл – Алланың құдіретінің арқасында адамдарға берілген үлкен сый әрі мүмкіндік. Тіл – адамзаттың негізгі жетістігі. Адам баласының ойдағыдай дамуының ең басты себебі де – тіл».
Президент өркениетті ел ретінде ана тіліміздің абырой-беделін арттыру үшін бүкіл қоғам болып табанды жұмыс істеу керектігін айтты.
Нақты тапсырмалар: Емле ережелерін жүйелеу және терминология
Жиында тіл саласындағы кейбір түйткілді мәселелер ашық айтылып, нақты міндеттер жүктелді:
- Емле ережелері:Мемлекет басшысы қазақ тілінің емле ережелерін жүйелеу және орфографиялық сөздіктерді жаңарту жұмысын 2027 жылдың соңына дейін толық аяқтауды тапсырды.
- Тілдік сын және жасанды аудармалар:Президент кейбір сөздердің қисынсыз аударылатынын қатаң сынға алды. Атап айтқанда, «күйсандық», «қылтима», «субұрқақ», «себезгі», «үнқағаз», «жеделсаты» сияқты сөздердің қажеттілігіне күмән келтірді.
- Арнайы жұмыс тобы:Тіл мәселелерін ғылыми тұрғыдан шешу үшін кәсіби мамандар мен сарапшылардан тұратын арнайы жұмыс тобын құру ұсынылды.
Тәуелсіздік және Конституцияның маңызы
Құрылтай қасиетті Тәуелсіздігіміздің 35 жылдығы қарсаңында өтуде. Ел Президенті соңғы жылдары атқарылған ауқымды реформаларға тоқталды:
- Ең бастысы, халқымыздың темірқазығына айналған қастерлі құжат – Конституциямыз қабылданды.
- Мазмұны айрықша Конституция Әділетті Қазақстанды құру ісіне заң тұрғысынан жол ашты.
- Тәуелсіздікті, егемендікті, кең байтақ жердің тұтастығын, азаматтардың құқықтары мен бостандықтарын қорғау мемлекеттің басты қастерлі міндеті саналады. «Тәуелсіздікті қорғау әрі нығайту – ең қасиетті борыш, ең қастерлі парыз!» деді Қасым-Жомарт Тоқаев.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
