САЛЫҚ ТӨЛЕУШІНІҢ НАҚТЫ ОРНАЛАСҚАН ЖЕРІН САЛЫҚТЫҚ ТЕКСЕРУ: ЖҮРГІЗУ ТӘРТІБІ ЖӘНЕ САЛЫҚ ТӨЛЕУШІНІҢ БОЛМАУЫНЫҢ САЛДАРЫ

Абай облысы бойынша Мемлекеттік кірістер департаменті хабарлайды!

Қазақстанда салықтық тексеру — салық төлеушінің тіркеу деректерінде көрсетілген мекенжайда нақты орналасқанын анықтау рәсімі.

ҚР Салық кодексінің 181-бабына сәйкес, тексеру жұмыс уақытында куәгерлердің қатысуымен жүргізіледі және фото- және бейнетіркеу міндетті түрде қолданылып, актімен рәсімделеді.

ТЕКСЕРУДІ ЖҮРГІЗУ ТӘРТІБІ

Негіздері: салық төлеушіге құжаттарды тапсыру мүмкін болмаған немесе пошта жөнелтілімдері адресатқа табысталмай қайтарылған жағдайда жүргізіледі.

Хабарлама: салық органы тексеру басталғанға дейін кемінде 3 жұмыс күні бұрын веб-портал немесе қосымша арқылы салық төлеушіге хабарлайды.

Жүргізілуі: салық органының қызметкерлері жұмыс уақытында тіркелген мекенжайға келеді.

Қатысушылар: тексеру кәмелетке толған кемінде екі тәуелсіз куәгердің қатысуымен жүргізіледі.

Тіркеу: тексеру нәтижелері фото- және бейнетіркеу міндетті түрде қолданылатын ресми актімен рәсімделеді.

САЛЫҚ ТӨЛЕУШІНІҢ БОЛМАУЫНЫҢ САЛДАРЫ

Ақпаратты жариялау: акт жасалғаннан кейінгі күні салық төлеушінің жоқ екендігі туралы ақпарат мемлекеттік органдардың интернет-ресурсында орналастырылады.

Хабарлама және келу: салық төлеушіге МКБ-ға келіп, болмау себептері туралы жазбаша түсініктеме және жылжымайтын мүлікке қатысты құжаттарды (үй-жайға меншік немесе пайдалану құқығын растайтын құжаттар) ұсыну қажеттігі туралы хабарлама жіберіледі.

Шектеулер: хабарлама талаптары белгіленген мерзімде орындалмаған жағдайда, заңнамада көзделген жағдайларда электрондық шот-фактураларды (ЭШФ) жазып беруді тоқтата тұру, банктік шоттар бойынша шығыс операцияларын тоқтата тұру, сондай-ақ ҚҚС бойынша тіркеу есебінен шығару мүмкін.

Теріс салдардың алдын алу үшін салық төлеушілерге тіркелген мекенжайда нақты болуды, салық органдарының хабарламаларын уақтылы алуды және олардың талаптарын белгіленген мерзімде орындауды ұсынамыз.