Ірімшік пен шұжықтан бастап тұрмыстық техника, балалар ойын алаңдары, автобустар мен арнайы техникаға дейін – Қарағанды облысындағы 80-ге жуық кәсіпорын «Қазақстанның үздік тауары – 2025» байқау-көрмесінің өңірлік кезеңінде өз өнімдерін көпшілік назарына ұсынды.
Кәсіпкерлер күніне орай ұйымдастырылған көрмеге ірі өнеркәсіп кәсіпорындары, шағын өндіріс орындары мен қолөнер шеберханалары қатысты.
— Қарағанды облысында 100 мыңнан астам шағын және орта бизнес субъектісі жұмыс істейді. Бұл салада еңбекке қабілетті халықтың жартысына жуығы жұмыспен қамтылған. Мемлекет басшысы отандық өндірісті өркендетіп, қазақстандық өнімнің сапасын арттыру міндетін қойып отыр. Бүгінгі көрме өңір кәсіпкерлерінің осы бағытта нәтижелі жұмыс істеп жатқанын айқын көрсетеді. Жергілікті кәсіпорындардың өнімдері сұранысқа ие, бәсекеге қабілетті және жаңа нарықтарға жол ашуда, - деді облыс әкімінің орынбасары Ораз Тәуірбеков кәсіпкерлерді кәсіби мерекесімен құттықтап.
Сапа саласындағы жетістіктері үшін облыс әкімінің арнайы жүлдесі «QazTehna» кәсіпорнына бұйырды. Компания жылына шамамен 1 600 автобус пен 1 200 бірлік коммерциялық техника шығарады.
Сонымен қатар өндірісті оқшаулау деңгейін кезең-кезеңімен арттырып келеді. Бұған ірі тораптарды құрастырумен қатар, автобус қаңқасының металл бөлшектерін өз өндірісінде дайындауды жолға қоюы дәлел.
— Біздің ең басты жетістігіміз — өнімдеріміздің Қазақстанның барлық өңірінде қолданысқа ие болуы. Автобус техникасы нарығының 70 пайыздан астамы біздің модельдердің үлесіне тиесілі. Еңбегіміздің еленіп, атқарып жатқан жұмысымызға лайықты баға берілгені қуантады, - деді «QazTehna» компаниясының бас директорының орынбасары Георгий Когай.
Биыл байқау шеңберінде «Инновациялық және цифрлық шешімдерді енгізгені үшін» атты жаңа арнайы аталым тағайындалды.
Бұл номинацияда «Перспектива» ғылыми-өндірістік бірлестігі жеңімпаз атанды.
Негізгі байқау үш аталым бойынша өтіп, қазылар алқасы әр бағытта үш жеңімпаздан, барлығы тоғыз кәсіпорынды үздік деп таныды.
«Өндірістік мақсаттағы үздік тауарлар» аталымында «Азия-СМ», «Бёмер Арматура» және «Инкар-I» компанияларының өнімі жоғары бағаланды. Олар антифриз, арматура, шарлы крандар, сондай-ақ өнеркәсіптік және арнайы технологиялық жабдықтар өндіреді.
«Халыққа арналған үздік тауарлар» аталымында тұрмыстық техника шығаратын «SilkRoad Electronics», Қарағанды металл бұйымдары зауыты және шаруашылық пен санитариялық-гигиеналық мақсаттағы қағаз өнімдерін өндіретін Sunpaper компаниясы жеңімпаздар қатарынан көрінді.
Ал «Азық-түлік тауарлары» аталымында Шет ауданындағы «Ауыл Дәмі» брендімен өнім шығаратын «Сыр өнімдері» кәсіпорны, бие мен түйе сүтін сублимация әдісімен өңдейтін «SaumalBioTech» және бидай ұнын өндіретін «Сарыарқа-ұн» компаниясы үздік деп танылды.
«Сыр өнімдері» кәсіпорны үшін бұл алғашқы марапат емес. 2025 жылы ол «Бір ауыл – бір өнім» жобасының финалына шығып, өндірістік жабдықтарын жаңғыртуға «Атамекен» өңірлік кәсіпкерлер палатасының грантын иеленген.
Қазір кәсіпорында сүт өнімдерінің 30-ға жуық түрі шығарылады. Мұнда тәулігіне 500 литрге дейін сүт өңделеді. Шикізат өз шаруашылығынан және Шет ауданындағы фермерлерден жеткізіледі. Өнімнің 100 пайызы жергілікті шикізаттан дайындалып, ауданнан тыс жерлерге де жөнелтіледі.
— Алғашында өндіріс көлемі шағын болды. Өз қожалығымыздағы сүтті өңдеп, сүзбе, сары май мен йогурт дайындаудан бастадық. Кейін өнім түрлерін көбейтуді ұйғардық. Гранттың арқасында қажетті жабдықтар сатып алып, жұмысшылар қабылдадық. Былтыр жеке өндірістік цехымызды салдық. Өнімдеріміз түгелдей табиғи шикізаттан дайындалады. Тұтынушылардың бізге қайта-қайта оралуының себебі де осында деп ойлаймын. Өйткені әр өнімнің басты құндылығы — сапасы мен оны дайындауға жұмсалған еңбек пен ықылас, - деді кәсіпорынның негізін қалаушы Жанар Қантарбаева.
Кәсіпкерлер күніне орай өңірдің бірқатар кәсіпорны мен кәсіпкерлері арнайы марапаттарға ие болды.
Үздік салық төлеушілер қатарында «KERABLOK», «КазСолар 50» және Qarmet компаниялары аталды.
«Әлеуметтік жауапкершілігі жоғары бизнес» аталымында Нұра ауданындағы Мұзбел ауылын дамытуға үлес қосып жүрген «Пржевальское» ЖШС марапатталды.
Ал өңірдің үздік сауда нысаны деп «Норма» супермаркеті танылды.
Өңірлік кезеңде жеңімпаз атанған кәсіпорындар республикалық байқауда Қарағанды облысының атынан өнер көрсетеді.
