Заңды білу және оны құрметтеу мәдениетін қалыптастыру – жастар тәрбиесінің маңызды бағыты. Осы мақсатта 28 қазанда Мойынқұм ауданы әкімдігінің ішкі саясат бөліміне қарасты «Жастар ресурстық орталығы» КММ ұйымдастыруымен студенттерге арналған «Заң мен тәртіп – қоғам тұрақтылығының негізі» атты кездесу өтті.
Іс-шара студент жастардың құқықтық сауаттылығын арттыруға, құқық бұзушылықтардың алдын алуға және қоғам алдындағы жауапкершілігін нығайтуға бағытталды. Кездесуде заң мен тәртіптің қоғамдық тұрақтылық пен қауіпсіздікті қамтамасыз етудегі маңызы түсіндірілді.
Студенттерге өз құқықтарымен қатар міндеттерін де білу, заң талаптарын сақтау және қоғамдық тәртіпті бұзбау қажеттігі айтылды. Құқықтық сауаттылық адамның өз мүддесін қорғай білуімен бірге, өзгенің құқығын құрметтеуінен де көрінеді. Сондықтан жастардың күнделікті өмірде қабылдайтын шешімдері мен іс-әрекеттеріне жауапкершілікпен қарауына назар аударылды.
Кездесу барысында құқық бұзушылықтың алдын алу мәселелері де қамтылды. Заңға құрметпен қарау, қоғамдық орындардағы тәртіпті сақтау және азаматтық жауапкершілікті сезіну қауіпсіз ортаны қалыптастырудың маңызды шарттары ретінде атап өтілді.
Осындай ақпараттық-түсіндіру кездесулері жастардың құқықтық білімін жетілдіруге және заң мен тәртіп қағидаттарын күнделікті өмірде ұстануына ықпал етеді. Құқықтары мен міндеттерін білетін, өз әрекетіне жауап бере алатын жас ұрпақ – қоғам тұрақтылығының берік тірегі.
