Мемлекет басшысы Қасым-Жомарт Тоқаевтың кітап оқу мәдениетін дамыту және зерделі ұлт қалыптастыру жөніндегі тапсырмасы аясында Түркістан облысында ауқымды жобалар ұйымдастырылып келеді. Осы орайда Түркістанда ұлы ағартушы Ыбырай Алтынсариннің туғанына 185 жыл толуына және облыстық Ы. Алтынсарин атындағы балалар кітапханасының құрылғанына 65 жыл толуына орай «Руханият ордасына – 65 жыл» атты дөңгелек үстел өтті.
Салтанатты іс-шараға Түркістан облысы әкімінің орынбасары Ертай Алтаев, мәдениет саласының өкілдері, ғалымдар, өңірлік және республикалық кітапханалардың басшылары мен кітапхана ісінің ардагерлері қатысты.
Жиын барысында кітапхананың заманауи цифрлық ресурстары – ресми веб-сайты, DSpace репозиторийі және «БАРЫС» электрондық каталогы көпшілік назарына ұсынылды.
Түркістан облысы әкімінің орынбасары Ертай Кенжебекұлы кітапхана ұжымын мерейтойымен құттықтап, мекеменің жас ұрпақтың рухани дүниесін байытуға, білімге құштарлығын арттыруға, ұлттық құндылықтарды дәріптеуге және кітап оқу мәдениетін қалыптастыруға зор үлес қосып келе жатқанын атап өтті.
Дөңгелек үстел барысында Ыбырай Алтынсариннің педагогикалық мұрасы, ұлттық тәрбие және музей жәдігерлерінің құндылығы туралы баяндамалар жасалды. Сонымен қатар іс-шарада кітапхананың дамуына өлшеусіз үлес қосқан ардагерлер жүрекжарды тілектерін жеткізді.
Мерейтойлық іс-шараның мақсаты – кітапхананың 65 жылдық тарихын саралау, рухани-мәдени мұрасын дәріптеу, балалар кітапханасының қоғамдағы орнын айқындау, кітап оқу мәдениетін насихаттау және кітапхана саласының дамуына үлес қосқан тұлғалардың еңбегін ұлықтау.
Түркістан облысы әкімінің баспасөз қызметі
