«Қауіпсіздік үздігі»: ШҚО-ның 6 мыңнан астам оқушысы қауіпсіздік ережелерін үйренуде
Шығыс Қазақстан облысында дәстүрлі «Қауіпсіздік үздігі» атты жетінші облыстық жоба басталды. Бұл — «Қазцинк» ЖШС, Білім басқармасы және ШҚО Полиция департаментінің бірлескен бастамасы.
Биыл бұл жоба Өскемен, Риддер, Алтай және Серебрянск қалаларының 6 мыңнан астам оқушысын қамтиды.
2026 жыл «Заң және тәртіп — қауіпсіз балалық шақ кепілі» ұранымен өтуде. Осыған орай кәмелетке толмағандарды қорғауға, құқықбұзушылықтың алдын алуға және балалар арасындағы жол-көлік жарақаттануының ескерту жұмыстарына ерекше назар аударылуда.
Оқушыларға арнайы жадынамалар мен жарық қайтаратын білезіктер дайындалды. Жадынамаларда көшеде және көлікте өзін қалай ұстау керектігі, бейтаныс адамдармен қарым-қатынас жасау және интернетті қауіпсіз пайдалану жөнінде қарапайым кеңестер жинақталған. Сондай-ақ балалар ата-аналарымен бірге үйден мектепке дейінгі қауіпсіз жол бағытын анықтап, сызып шыға алады.
Жобаның алғашқы қатысушылары Өскемен қаласындағы №30 мектептің оқушылары атанды. Қоғамдық қауіпсіздік, ювеналдық және патрульдік полиция бөлімшелерінің қызметкерлері балаларға арнап «қауіпсіздік сәтін» өткізді: жол жүру ережелерін еске салып, ықтимал қауіпті жағдайларды талқылады және көмек сұрайтын орындарды түсіндірді.
Мұндай кездесулер балаларға тек ережелерді жаттап қана қоймай, қиын жағдайда дұрыс әрекет етуді түсінуге көмектеседі.
Жұмыс жалғасуда — жақын арада өңірдің басқа қалаларының оқушылары да жадынамалар мен жарқырайтын білезіктерді алады.
Заң мен тәртіп балалық шақтан — білім, жауапкершілік және дұрыс дағдылар арқылы қалыптасады.
ШҚО ПД баспасөз қызметі
