Атырау облысының полиция департаменті азаматтарды қоғамдық қауіпсіздікке қатысты жалған хабарламалар таратпауға шақырады.
Жыл басынан бері облыс аумағында жарылғыш зат қойылғаны туралы бірнеше жалған хабарлама тіркелді. Түскен әрбір хабарлама бойынша тиісті тексеру жүргізіліп, олардың жалған екені анықталды. Жарылғыш заттар мен өзге де қауіпті заттар табылған жоқ. Полиция мұндай әрекетті әзіл немесе елеусіз қылық деп қабылдамауға шақырады. Жалған хабарламаға байланысты адамдар эвакуацияланып, ғимараттар мен аумақтар тексеріледі. Бұл ретте жедел қызметтердің уақыты мен ресурстары негізсіз жұмсалып, азаматтардың қауіпсіздігіне қосымша тәуекел туындайды.
Айта кетейік, ҚР Қылмыстық кодексінің 273-бабына сәйкес, терроризм актісі туралы көрінеу жалған хабарлау үшін қылмыстық жауапкершілік қарастырылған. Жаза ретінде 5000 айлық есептік көрсеткішке дейінгі мөлшерде айыппұл салу, сол мөлшерде түзеу жұмыстарына тарту, бес жылға дейін бас бостандығын шектеу немесе сол мерзімге бас бостандығынан айыру көзделген.
Полиция азаматтарды кез келген ақпаратқа жауапкершілікпен қарауға, жалған хабар таратпауға және қоғамдық қауіпсіздікке қатер төндіретін әрекеттерден бас тартуға шақырады.
Жалған хабарлама – әзіл емес, қылмыстық жауапкершілікке әкелетін әрекет.
