Шымкент қаласында қоғамдық тәртіп пен азаматтардың қауіпсіздігін қамтамасыз ету мақсатында полиция қызметкерлерінің дәстүрлі гарнизондық тарату рәсімі өтті.
Саптық тарату рәсімін Шымкент қаласы Полиция департаментінің бастығы, полиция генерал-майоры Мұхтар Жұмабайұлы Қожаев өткізді. Жиын барысында жеке құрамның саптық дайындығы тексеріліп, қызметтік тәртіпті, заңдылықты және полиция қызметкерінің кәсіби әдеп қағидаларын нығайтуға бағытталған «Саптағы заңдылық» атты бір апталық іс-шара басталғаны жеткізілді.
Іс-шараның мақсаты – құқық бұзушылықтардың алдын алу, қызметтік тәртіпті нығайту және жеке құрамның кәсіби мәдениетін арттыру. Осыған байланысты басшыларға қарамағындағы қызметкерлердің қызметтік тәртібін, заң талаптарын сақтауын және моральдық-психологиялық ахуалын тұрақты бақылауда ұстау тапсырылды.
Саптық тарату барысында бірқатар қызметкерлерге кезекті арнаулы атақтар табысталды. Сондай-ақ, қызметтік міндеттерін адал атқарып, жоғары нәтижелерге қол жеткізген қызметкерлер және Петропавл қаласында өткен республикалық волейбол турнирінде II орын иеленген Шымкент қаласы Полиция департаментінің құрама командасы марапатталды.
