Алматыда адам өмірін құтқару кезінде батылдық, жанқиярлық пен азаматтық жауапкершілік танытқан полиция қызметкерлеріне арналған ІІМ-нің дәстүрлі «Қазіргі заман қаһарманы» республикалық акциясы өтуде.
Жыл сайын ұйымдастырылатын ауқымды іс-шара еліміздің түкпір-түкпірінен ішкі істер органдарының өкілдерін жинайды. Биыл акцияны өткізу алаңы ретінде Алматы қаласы таңдалды. Іс-шараға ішкі істер органдарының ардагерлері, Алматы қаласы Полиция департаментінің басшылығы мен жеке құрамы, сондай-ақ Қазақстанның түрлі өңірінен келген акция кейіпкерлері қатысуда.
Салтанатты бағдарлама қызметтік міндетін атқару кезінде қаза тапқан ішкі істер органдары қызметкерлерінің ескерткішіне гүл шоқтарын қою рәсімінен басталды. Қатысушылар азаматтардың қауіпсіздігі мен қоғамдық тәртіпті қорғау жолында өз өмірін қиған қызметкерлердің рухына тағзым етті.
Іс-шараның ашылуында Алматы қаласы Полиция департаментінің бастығы Айдын Кабдулдинов тарихи жадты сақтау, ардагерлерге құрмет көрсету және қазіргі полиция қызметкерлерінің еңбегін бағалаудың маңыздылығына тоқталды.
«Ерлік тек марапатпен өлшенбейді. Нағыз батылдық қиын сәтте жауапты шешім қабылдап, қауіп-қатерден тайсалмай, өзгенің өмірін өз өмірінен жоғары қоя білуден көрінеді. Полиция қызметінің шынайы мәні осындай әрекеттерден байқалады. Бүгінгі қаһармандар – жас ұрпаққа лайықты үлгі. Олар Заң мен Отанға қызмет ету ең алдымен адам алдындағы жауапкершіліктен басталатынын айқын көрсетіп отыр», – деді Айдын Кабдулдинов.
Акция аясында ұрпақтар сабақтастығына да ерекше мән беріледі. Ардагерлердің мол тәжірибесі, мамандыққа адалдығы мен қызметтік дәстүрлерге беріктігі қазіргі полицияның дамуының маңызды негізі болып қала береді.
«Қазіргі заман қаһарманы» акциясы қызметкерлердің ерлігін дәріптеп қана қоймай, адам өмірін қорғауды, азаматтардың қауіпсіздігін қамтамасыз етуді және қызметтік борышқа адалдықты басты міндет санайтын жандарға қоғамның құрметін арттыруды көздейді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
