Осакаровка кентінде үй жануарлары мен ауыл шаруашылығы жануарларына кең ауқымды қызмет көрсететін жеке ветеринариялық клиника ашылуға дайындалуда. Жергілікті кәсіпкер Асхат Құсайыновтың бұл жобасын жүзеге асыруына аудан әкімінің 2 миллион теңге көлеміндегі гранты қолдау болды.
Асхат Құсайынов – Николаевка ауылының тумасы. Оның ветеринария саласына қызығушылығы мектеп кезінен басталған. Әкесі Қайрат Берниязұлы Құсайынов зоотехник болып жұмыс істегендіктен, болашақ маман бала кезінен жануарларды күтіп-бағудың қыр-сырын меңгеріп өсті. Кейін Қарқаралыда ветеринариялық білім алып, өмірін осы мамандықпен байланыстырды.
Бүгінде Асхат Құсайынов аудан аумағындағы елді мекендерге барып, үй жануарлары мен ауыл шаруашылығы малдарына ветеринариялық көмек көрсетеді. Шаруа қожалықтарымен де тығыз байланыста жұмыс істейді. Емдеу шараларымен қатар дезинфекция, дезинсекция және дератизация жұмыстарын жүргізеді.
Жеке клиника ашу идеясы бірнеше жыл бойы қалыптасқан. Осы мақсатта кәсіпкер өз қаражатына модульдік ғимарат сатып алып, оны ветеринариялық клиника ретінде жабдықтауға кіріскен.
— Ауданда ветеринариялық қызметке сұраныс жоғары. Кей күндері таңертеңнен кешке дейін шақыртулармен жүремін. Бір шаруашылықта жұмыс істеп жатқанда, басқа елді мекендерден де өтініштер түсіп жатады. Сондықтан тұрғындар үй жануарларын өздері алып келе алатын клиника ашуды көптен бері жоспарлап жүрдім. Аудан әкімінің гранты осы бастамама үлкен қолдау болды. Бөлінген қаражат қажетті құрал-жабдықтарды сатып алуға жұмсалды, — дейді Асхат Құсайынов.
Жаңа клиникада жануарларға вакцина егу, кастрациялау және стерильдеу, халықаралық ветеринариялық паспорт рәсімдей отырып чип орнату, сондай-ақ емдеу және алғашқы ветеринариялық көмек көрсету қызметтері ұсынылады.
Клиникамен қатар ветеринариялық дәріхана да ашу жоспарланған. Қазіргі уақытта кәсіпкер қажетті құжаттарды рәсімдеп, ғимараттарды жабдықтау жұмыстарын жүргізуде.
Жануар иелеріне қолайлы жағдай жасау мақсатында пациенттердің электрондық дерекқоры енгізілмек. Онда жүргізілген ем-шаралар мен екпелер туралы мәліметтер сақталып, қайталама вакцинация мерзімі жақындаған кезде иелеріне уақытылы ескерту жасауға мүмкіндік туады.
Ветеринардың айтуынша, биыл кене шағуы арқылы жұғатын ауруларға байланысты өтініштер көп түскен. Алайда күрделі диагностикалық зерттеулер жүргізу үшін әзірге арнайы жабдықтар жеткіліксіз.
— Болашақта ультрадыбыстық зерттеу аппаратын, рентген құрылғысын және зертханалық анализаторларды сатып алғымыз келеді. Мұндай жабдықтардың құны жоғары болғандықтан, клиниканы кезең-кезеңімен дамытуды көздеп отырмыз. Қазір басты мақсатымыз — клиниканы іске қосып, тұрғындарға негізгі ветеринариялық қызметтердің қолжетімділігін қамтамасыз ету, — деп атап өтті кәсіпкер.
Асхаттың бастамасына отбасы да қолдау көрсетуде. Әсіресе, саналы ғұмырын ұстаздық қызметке арнаған анасы Гүлбану Дақанқызы Өтелбаева ұлының кәсібін дамытуына ерекше демеу болып отыр. Асхаттың жануарларға деген сүйіспеншілігі кәсіби қызметімен ғана шектелмейді. Оның үйінде Кузя есімді мысығы да бар.
Ветеринариялық клиника мен дәріхананы Осакаровка кенті, Надречная көшесі, 11-үй мекенжайында ағымдағы жылдың соңына дейін ашу жоспарланып отыр. Қазір алғашқы төрт аяқты пациенттерді қабылдауға дайындық жұмыстары жалғасуда.
Жобаның жүзеге асуы ауданда ветеринариялық қызметтердің қолжетімділігін арттырып, жануарларға уақытылы әрі сапалы көмек көрсету мүмкіндігін кеңейтеді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
