Павлодар қаласы Полиция басқармасының профилактика кабинетінде отбасылық-тұрмыстық қатынастар саласында құқыққа қайшы әрекеттерге жол беретін азаматтармен профилактикалық әңгіме өткізілді. Іс-шара Отбасын қолдау орталығының психологымен бірлесіп ұйымдастырылды.
Кездесудің негізгі мақсаты – отбасылық-тұрмыстық зорлық-зомбылықтың алдын алу, қайталама құқық бұзушылықтарға жол бермеу, сондай-ақ азаматтардың өз іс-әрекеттері мен отбасындағы мінез-құлқына жауапкершілікпен қарауын қалыптастыру.
Әңгімелесу барысында қатысушыларға отбасылық-тұрмыстық салада құқық бұзушылық жасаудың құқықтық салдары жан-жақты түсіндіріліп, жақындарына қатысты күш қолдануға, қорқытуға, қорлауға және өзге де құқыққа қайшы әрекеттерге жол берілмейтіні ескертілді.
Әсіресе эмоцияны бақылау, жанжалдарды сындарлы түрде шешу, өзара сыйластық және отбасы мүшелерінің психологиялық әрі физикалық саулығы үшін жауапкершілік мәселелеріне ерекше назар аударылды.
Отбасын қолдау орталығының психологы да өз мінез-құлқымен жұмыс істеудің, эмоцияны басқара білудің және өмірдегі күрделі жағдайлардан бейбіт жолмен шығудың маңыздылығына тоқталды.
Мұндай профилактикалық іс-шаралар құқық бұзушылықтардың алдын алуға ғана емес, сонымен қатар отбасылық қарым-қатынасты сақтауға, азаматтардың құқықтары мен қауіпсіздігін қорғауға бағытталған.
Есте ұстаған жөн: отбасы – сыйластық, өзара түсіністік пен қауіпсіздік салтанат құратын орта болуы тиіс. Зорлық-зомбылықтың кез келген көрінісіне жол берілмейді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
