1 / 5
Кәсіпкер тауарды сатылымға шығармас бұрын нені білуі керек? Оның белгіленген талаптарға сәйкестігін қандай құжаттар растайды және тексеру кезінде ең алдымен неге назар аударылады? Бұл мәселелер Ақмола облысының санитариялық-эпидемиологиялық бақылау департаменті ұйымдастырған дөңгелек үстелде талқыланды.
Кездесуге мемлекеттік органдардың, сараптама ұйымдарының және бизнес өкілдері қатысты. Бір үстел басына «Атамекен» өңірлік кәсіпкерлер палатасының, Сауда және тұтынушылардың құқықтарын қорғау департаментінің, Техникалық реттеу және метрология комитеті департаментінің, Ұлттық сараптама орталығының, санитариялық-эпидемиологиялық бақылау мамандарының, сондай-ақ сауда, тамақ және жеңіл өнеркәсіп салаларында қызмет ететін кәсіпкерлердің өкілдері жиналды.
Кездесудің басты тақырыбы сөрелерге қойылатын тауарлардың сапасы мен қауіпсіздігі үшін жауапкершілік мәселесі болды. Қатысушылар өнімді жай ғана сатып алып, тұтынушыға ұсыну жеткіліксіз екенін атап өтті. Тауардың қажетті құжаттары болуы, техникалық регламенттердің талаптарына сәйкес келуі және тиісті таңбамен қамтамасыз етілуі маңызды.
Негізгі баяндама жасаған департамент басшысының орынбасары Сауле Садвакасова техникалық регламенттер талаптарын сақтау тексерістерден өту үшін орындалатын формальды талап емес, кәсіпкерлердің күнделікті жұмысының ажырамас бөлігі болуы тиіс екенін атап өтті. Өйткені әрбір тауарға сатушы жауапты, ал белгіленген талаптардың сақталуы тұтынушылардың қауіпсіздігі мен мүдделерін қорғауға бағытталған.
Ол сәйкестік туралы декларацияларға ерекше тоқталып, оларды рәсімдеу тәртібін түсіндірді, өнімді өткізу кезінде рұқсат құжаттарының маңызын атап өтті және белгіленген талаптарды сақтамаудың салдарын еске салды. Қажетті құжаттардың болмауы әкімшілік жауапкершілікке әкеп қана қоймай, тауардың тұтынушы үшін қауіпсіздігіне де күмән тудыруы мүмкін.
Сондай-ақ департаменттің бөлім басшысы Жанар Калиева 2026 жылдың тоғыз айындағы бақылау мақсатында сатып алу нәтижелері туралы ақпарат ұсынды. Оның айтуынша, мұндай іс-шаралар заңбұзушылықтарды анықтауға және тауарларды сату кезінде талаптардың қаншалықты адал сақталатынын бағалауға мүмкіндік береді.
Бұдан бөлек, дөңгелек үстелде ТР 022/2011 техникалық регламентіне сәйкес өнімді таңбалаудың негізгі талаптары, сатушылардың тауар қауіпсіздігін қамтамасыз ету жөніндегі міндеттері және өнімді өткізу кезінде тұтынушылардың құқықтарын қорғау мәселелері қаралды.
Қатысушыларға таңбалау ақпараты толық, түсінікті әрі шынайы болуы керектігі ескертілді. Себебі дәл осы ақпарат тұтынушыға тауар туралы қажетті мәліметтерді алуға көмектеседі.
Кездесу қорытындысы бойынша кәсіпкерлерге құжаттарды рәсімдеуге мұқият қарау, сәйкестік туралы декларацияларды уақтылы алу және заңнама талаптарын қатаң сақтау ұсынылды.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
