Қарқаралыдан Балқашқа дейін: Қарағанды облысында браконьерліктің екі дерегі анықталды

Қарқаралыдан Балқашқа дейін: Қарағанды облысында браконьерліктің екі дерегі анықталды. Қарағанды облысында «Браконьер» жедел-профилактикалық іс-шарасы барысында табиғатқа зиян келтірген екі заңсыз әрекеттің жолы кесілді. Заңсыз аңшылық пен балық аулаудың алдын алу мақсатында табиғат қорғау полициясының мамандандырылған мобильді топтары жұмыс жүргізуде. Браконьерліктің алғашқы дерегі Қарқаралы ауданында тіркелді. Таулы аймақтан шыға берісте полицейлер Шет ауданының 29 жастағы тұрғыны тізгіндеген Toyota Harrier автокөлігін тоқтатқан. Көлікті тексеру кезінде салоннан Қазақстан Республикасының Қызыл кітабына енгізілген сирек кездесетін арқардың ұшасы табылды. Ал екінші заңсыз әрекет Балқаш көлінің акваториясында анықталды. Жағалаудан шамамен 15 шақырым қашықтықта Алматы облысының 47 және 25 жастағы екі тұрғыны ұсталды. Олар балық аулауға тыйым салынған ау құралдарын пайдаланып, заңсыз кәсіппен айналысқан. Нәтижесінде 50 келіден астам балық ауланған. Табиғатқа келтірілген шығын көлемі 500 мың теңгеден асады. Аталған екі дерек бойынша қылмыстық істер қозғалды. Қазіргі уақытта қажетті тергеу амалдары жүргізіліп жатыр.