Елдік пен егемендіктің еңсесін көтерген мереке: Абай облысының полицейлері кәсіби қызметтегі үздіктерді марапаттады
Республика күні – мемлекеттің мерейін асқақтатып, елдік құндылықтарды дәріптейтін, Отанға деген сүйіспеншілік пен азаматтық жауапкершілікті айшықтайтын айрықша мереке. Ұлттық мереке қарсаңында Абай облысы Полиция департаментінде салтанатты іс-шара өтіп, ел тыныштығы мен қоғамдық қауіпсіздікті қамтамасыз ету жолында абыройлы қызмет етіп жүрген тәртіп сақшыларына құрмет көрсетілді.
Салтанатты жиын барысында қызметтік міндеттерін мінсіз атқарып, жоғары кәсібилігімен, табандылығымен және адалдығымен ерекшеленген полицейлер арнайы марапаттарға, төсбелгілерге және грамоталарға ие болды. Бұл марапаттар – күнделікті қызметтің нәтижесіне берілген баға ғана емес, заң мен тәртіпті сақтау жолындағы жауапты еңбектің, азаматтар алдындағы адалдықтың айқын көрінісі.
Абай облысы Полиция департаментінің бастығы полиция полковнигі Эльдар Данияров Республика күнімен құттықтап, тәртіп сақшыларының ел қауіпсіздігін қамтамасыз етудегі маңызды рөлін атап өтті.
«Республика күні – тәуелсіздігімізді тұғыр еткен, бірлігімізді бекемдеп, мемлекет алдындағы жауапкершілігімізді айқындайтын қастерлі мереке. Ел тыныштығын сақтау, азаматтардың құқықтары мен қауіпсіздігін қорғау – әрбір полицейдің абыройлы міндеті. Бұл жолда кәсібилікпен қатар, адалдық, батылдық және Отанға деген шынайы сүйіспеншілік қажет. Бүгінгі марапат – әріптестеріміздің қажырлы еңбегіне көрсетілген құрмет. Барша қызметкерлерге ел игілігі жолындағы еңбектеріне табыс, отбасыларына амандық тілеймін», – деді Эльдар Данияров.
Полиция қызметі – тек заң талаптарын орындау ғана емес, ол – халық сенімін ақтау, әрбір азаматтың қауіпсіздігіне жауапкершілікпен қарау және қоғамдағы тұрақтылықты сақтау. Осы міндеттерді абыроймен атқарып жүрген тәртіп сақшыларының еңбегін бағалау – қызметтік рухты нығайтып, кәсіби жауапкершілікті арттырудың маңызды бөлігі.
Мерекелік жиын қызметтік міндетке адалдықтың, кәсіби бірліктің және ортақ мақсат жолындағы табандылықтың мәнін тағы бір мәрте айқындады. Марапат иелері үшін бұл – атқарылған іске берілген лайықты баға әрі алдағы уақытта да биік жауапкершілікпен қызмет етуге серпін.
Ел тыныштығы – басты құндылық, халық сенімі – ең жоғары марапат.
