РЕСПУБЛИКА КҮНІНЕ ОРАЙ САРЫАҒАШ АУДАНЫНДА ЗАМАНАУИ СПОРТ АЛАҢШАЛАРЫ ПАЙДАЛАНУҒА БЕРІЛДІ.

Мемлекет басшысы Қасым-Жомарт Тоқаевтың бұқаралық спортты дамыту және жастарға арналған спорттық нысандардың қолжетімділігін арттыру жөніндегі тапсырмасын орындау мақсатында Ақжар,Жемісті ауылдық округтеріне қарасты елді мекендерде заманауи спорт алаңшалары пайдалануға берілді.

Ақжар ауылдық округінде ашылу рәсімне ҚР денсаулық сақтау вице-министрі Ербол Оспанов, Сарыағаш ауданының әкімі Арман Абдуллаев қатысып, ауыл тұрғындарын мерекемен құттықтады.

Ашылу рәсімінде аудан әкімі жаңа спорт нысандарының ауыл тұрғындары, әсіресе жас ұрпақ үшін маңызы зор екенін атап өтті.

– Бұл – мемлекетіміздің жас ұрпақты қолдауға, олардың денсаулығын нығайтуға және бұқаралық спортты дамытуға бағытталған жүйелі саясатының жарқын көрінісі. Жаңа спорт алаңшалары балалар мен жастардың бос уақытын тиімді өткізуіне, салауатты өмір салтын ұстануына және спортқа деген қызығушылығын арттыруға мүмкіндік береді. Осындай игі бастамалар ауыл жастарының спортпен тұрақты айналысуына жол ашып, болашақ чемпиондардың қалыптасуына ықпал етеді, – деді аудан әкімі.

Аталған спорт алаңшалары аудандық бюджет есебінен салынды. Нысандарда кіші футбол ойнауға арналған арнайы алаңдар, workout аймақтары, сондай-ақ балаларға арналған әткеншектер мен сырғанақтар қарастырылған.

Жаңа спорт нысандарының пайдалануға берілуі – елді мекендердің инфрақұрылымын жақсарту, тұрғындардың өмір сүру сапасын арттыру және өскелең ұрпақтың салауатты өмір салтын қалыптастыру жолындағы маңызды қадам.

Сарыағаш ауданы әкімінің баспасөз қызметі