САРЫАҒАШТА «ТАЗА ЖОЛ – ТАЗА ОРТА» АКЦИЯСЫ ӨТТІ

Сарыағаш ауданында «Таза Қазақстан» жалпыұлттық экологиялық бағдарламасы аясында «Таза жол – таза орта» акциясы өтті. Іс-шараның негізгі мақсаты – жол бойындағы тазалықты қамтамасыз ету, қоршаған ортаны қорғау және тұрғындардың экологиялық мәдениетін арттыру.

Тазалық шарасына мемлекеттік мекемелердің қызметкерлері мен белсенді азаматтар қатысып, аудан аумағын таза ұстауға өз үлестерін қосты.

Акция барысында облыстық маңызы бар автожолдардың және ішкі көшелердің бойы күл-қоқыстан тазартылып, арық-атыздар ретке келтірілді. Сонымен қатар жол жиектеріндегі шөптер орылып, жиналған қоқыстар арнайы техникалар арқылы шығарылды.

«Таза Қазақстан» бағдарламасы аясында ұйымдастырылған мұндай шаралар елді мекендердің санитарлық жағдайын жақсартуға және тұрғындар арасында қоршаған ортаға деген жауапкершілікті қалыптастыруға бағытталған.

Тазалықты сақтау – баршаға ортақ міндет. Әрбір тұрғынның қоршаған ортаға жанашырлықпен қарап, өз ауласы мен айналасын таза ұстауы ауданның көркеюіне ықпал етеді.

Осы орайда аудан тұрғындары мен кәсіпкерлерді тазалықты сақтауға, экологиялық бастамаларға белсенді қатысуға және туған өлкенің көркеюіне үлес қосуға шақырамыз.

Сарыағаш ауданы әкімінің баспасөз қызметі