Абай облысы бойынша Қылмыстық-атқару жүйесі департаментінің қауіпсіздігі барынша төмен мекемесінде алаяқтық жасағаны үшін жазасын өтеп жатқан сотталған азамат көпбалалы және аз қамтылған отбасыларға қолдау көрсетуге бағытталған «Қамқорлықпен дайындалған түскі ас» атты қайырымдылық акциясын өткізу туралы бастама көтерді.
Қостанай облысының тұрғыны, 42 жастағы сотталған азамат қалалық дәмханалардың бірінде жұмыс істеп, аспаз мамандығын меңгерген. Мекеме қызметкерлерімен әңгімелесу барысында ол өз дағдыларын мұқтаж отбасыларға көмектесу үшін пайдаланғысы келетінін айтып, қайырымдылық акциясын ұйымдастыруды ұсынды. Мекеме әкімшілігі сотталған азаматтың бастамасын қолдап, акцияны ұйымдастыруға жәрдемдесті және көмекке мұқтаж отбасыларды анықтауға көмектесті.
Акция аясында сотталған азамат бес отбасына барып, оларға ыстық тағамдар, салаттар мен сусындарды өз қолымен дайындап берді. Көмек көрсетілген отбасылардың бірі — 5 пен 15 жас аралығындағы сегіз баланы жалғыз тәрбиелеп отырған анасы бар көпбалалы отбасы. Бұл отбасы үшін толыққанды үй тағамдарынан тұратын түскі ас әзірленді.
— Мен аспаз болып жұмыс істеймін және өз дағдыларымды адамдарға көмектесу үшін пайдалана аламын деп шештім. Мекеме қызметкерлерімен әңгімелесу кезінде осындай қайырымдылық акцияларын өткізу туралы ойымды айттым. Бастамамды қолдап, оны ұйымдастыруға көмектескен әкімшілікке алғысымды білдіремін. Балалардың қуанышын көріп, ата-аналардың алғысын естігенде, игі іс жасап жүргеніңді түсінесің. Алдағы уақытта да бұл акцияны жалғастырып, көпбалалы және көмекке мұқтаж отбасыларға ас әзірлеп, шын мәнінде қолдауға мұқтаж жандарға көмектескім келеді, — деп бөлісті сотталған азамат.
— Мекеме әкімшілігі сотталғандардың қоғамға қайта бейімделуіне бағытталған бастамаларға ерекше көңіл бөледі. Сотталған азамат көпбалалы отбасыларға көмектескісі келетінін айтқан кезде, оның бастамасы қолдау тауып, акцияны ұйымдастыруға қажетті көмек көрсетілді. Мұндай жобалар адамның бойындағы дағдыларын қоғам игілігіне жарата алатынын көрсетеді. Бұл сотталғандардың жауапкершілігін арттырып, өзгелерге пайдасын тигізуге және заңға бағынатын өмір салтын ұстануға деген ұмтылысын қалыптастыруға ықпал етеді.
«Қамқорлықпен дайындалған түскі ас» акциясы алдағы уақытта да жалғасын табады. Мұндай бастамалар қиын өмірлік жағдайға тап болған отбасыларға қолдау көрсетіп қана қоймай, сотталғандардың әлеуметтік бейімделуіне, жауапкершілік сезімінің артуына және қоғамға пайда келтіруге деген ынтасының қалыптасуына ықпал етеді, — деп атап өтті сотталғандарды тұрмыстық және еңбекке орналастыру жөніндегі аға инспектор Зарина Карменова.
