Мемлекет пен қоғам күш біріктіруде: Ереванда Қазақстан жастарының биоәртүрлілікті сақтауға қатысуы талқыланды

Биологиялық әртүрлілік туралы конвенция Тараптары конференциясының 17-ші отырысы аясында Қазақстан Республикасы Экология және табиғи ресурстар министрлігі Орман шаруашылығы және жануарлар дүниесі комитетінің төрағасы Данияр Тұрғамбаев Қазақстандағы Биоәртүрлілік жөніндегі жаһандық жастар желісінің (GYBN Chapter Kazakhstan) өкілдерімен кездесті.

Кездесуге КС-17 төрағасы Амбарцум Матевосян қатысты. Ол Қазақстан Үкіметі мен қазақстандық жастарға КС-17 жұмысына белсенді қатысқаны үшін алғыс білдіріп, келіссөздердің табысты өтуіне тілектестік білдірді.

Кездесу барысында жастардың табиғатты қорғау бастамаларына қатысу мүмкіндіктері және Комитетпен ынтымақтастықты дамыту мәселелері талқыланды. Данияр Тұрғамбаев қатысушыларды биоәртүрлілікті сақтау бағытындағы жұмыстармен және Қазақстанның СИТЕС, Жабайы жануарлардың қоныс аударатын түрлерін сақтау туралы конвенция мен Рамсар конвенциясын қоса алғанда, халықаралық табиғат қорғау келісімдеріне қатысуымен таныстырды.

Ақбөкендер санының өсуіне, жолбарыс пен Пржевальский жылқысын қайта жерсіндіруге, сондай-ақ табиғатты қорғау жобаларын іске асыруға халықаралық донорлардың қатысуына ерекше назар аударылды.

GYBN Chapter Kazakhstan өкілдері КС-17 аяқталғаннан кейін биоәртүрлілікті сақтау мәселелері бойынша қоғамдық пікірді зерттеу жобасын ұсыну ниетін білдірді.

Кездесу қорытындысы бойынша Комитет пен жастар өкілдері өзара іс-қимылды жалғастыруға және ынтымақтастықтың нақты бағыттары мен ықтимал бірлескен бастамаларды талқылау үшін Қазақстанда кездесу өткізуге қызығушылық танытты.