Астана қаласының Төтенше жағдайлар департаменті қала еріктілеріне азаматтық қорғау, өрт қауіпсіздігі, эвакуациялау тәртібі және алғашқы медициналық көмек көрсету бойынша оқыту ұйымдастырды.
Іс-шараның негізгі мақсаты – еріктілердің төтенше жағдайлар кезіндегі әрекет ету дағдыларын жетілдіру, халықтың қауіпсіздігін қамтамасыз етуге дайындығын арттыру және төтенше жағдайлардың алдын алу бағытындағы білімдерін нығайту.
Оқыту барысында қатысушыларға азаматтық қорғау саласындағы негізгі талаптар түсіндіріліп, өрт туындаған кездегі іс-қимыл тәртібі, адамдарды қауіпсіз жерге эвакуациялау қағидалары, алғашқы медициналық көмек көрсету тәсілдері және төтенше жағдайлар кезінде дұрыс шешім қабылдау жолдары таныстырылды.
Сонымен қатар, еріктілерге халық арасында қауіпсіздік мәдениетін қалыптастыру, түсіндіру жұмыстарын жүргізу және төтенше жағдайлардың алдын алу шараларына белсенді қатысу жөнінде ақпарат берілді.
Астана қаласы Төтенше жағдайлар департаменті азаматтық қорғау саласындағы профилактикалық жұмыстарды жалғастырып, халықтың қауіпсіздігін қамтамасыз етуге және еріктілер қозғалысын дамытуға ерекше назар аударады.
