AI-Sana: М.Әуезов атындағы ОҚУ студенттері мал шаруашылығын басқарудың интеллектуалды жүйесін әзірледі
AI-Sana көрмесі аясында М.Әуезов атындағы Оңтүстік Қазақстан университетінің студенттері мал шаруашылығын цифрлық басқаруға арналған Smart Qora AI аппараттық-бағдарламалық кешенін таныстырды. Жоба жасанды интеллект пен заманауи цифрлық технологияларды біріктіре отырып, мал басын есепке алу, оның орналасқан жері мен қозғалысын бақылау, ветеринариялық жағдайын қадағалау және шаруашылықтағы негізгі процестерді автоматтандыруға бағытталған.
Smart Qora AI жүйесінің басты ерекшелігі – әр жануарға жеке цифрлық ID тағайындап, ол туралы негізгі ақпаратты бірыңғай ақпараттық жүйеде жинақтау мүмкіндігі. Осылайша фермер малдың орналасқан жерін, қозғалысын, ветеринариялық шараларының тарихын және басқа да көрсеткіштерін қашықтан бақылай алады.
Жоба аясында Artificial Intelligence (AI), UHF RFID, GPS, LoRaWAN, Smart Gate және интеллектуалды бейнеаналитика технологиялары бір платформаға біріктірілген. RFID белгісі арқылы жануар автоматты түрде сәйкестендіріліп, Smart Gate арқылы өткен кезде жүйеде тіркеледі. Ал GPS және LoRaWAN құрылғылары жайылымдағы малдың орналасқан жері мен қозғалыс бағытын бақылауға мүмкіндік береді.
Жүйе мал басын автоматты есепке алумен қатар әр жануарға жеке цифрлық профиль қалыптастырады. Камералар мен жасанды интеллект технологиялары жануарларды анықтап, белгіленген аумақтан шығып кеткен немесе жоғалған малды тіркеуге, сондай-ақ қозғалысындағы күдікті өзгерістер туралы автоматты түрде ескерту жіберуге мүмкіндік береді.
Smart Qora AI-дың маңызды бағыттарының бірі – цифрлық ветеринария. Жүйеде әр жануардың электрондық ветеринариялық паспорты жүргізіліп, вакцинация, диагностика және профилактикалық шаралар туралы ақпарат сақталады. Бұл ветеринариялық бақылауды жүйелеуге және қажетті мәліметтерді жедел алуға мүмкіндік береді.
Жобаның AI-аналитика модулі камералардан, RFID және GPS құрылғыларынан алынған деректерді бір жүйеде талдайды. Жасанды интеллект малдың қозғалыс белсенділігіндегі өзгерістерді анықтап, қалыптан тыс жағдайларды белгілеуге мүмкіндік береді. Жиналған деректер негізінде фермер мен жауапты мамандарға басқарушылық шешім қабылдауға қажетті аналитикалық ақпарат ұсынылады.
Сонымен қатар Smart Qora AI веб және мобильді интерфейс арқылы қашықтан басқаруды, шаруашылық бойынша қажетті есептерді автоматты түрде қалыптастыруды және болашақта мемлекеттік ақпараттық жүйелермен интеграциялануды көздейді.
Студенттердің әзірлемесі ауыл шаруашылығындағы дәстүрлі процестерді цифрландырумен қатар, деректерге негізделген басқару мәдениетін қалыптастыруға бағытталған. Smart Qora AI технологиялары мал шаруашылығындағы бақылау мен есеп жүргізуді жеңілдетіп, фермерлерге шаруашылықты тиімді басқаруға мүмкіндік беретін цифрлық құрал ұсынады.
