Бүгін, 7 қазанда Ақтау қаласының әкімі Мақсат Мұқаш көпбалалы аналарға мемлекеттік наградаларды табыстады. Барлығы 8 ана марапатталып, оның ішінде 3 анаға «Алтын алқа», 5 анаға «Күміс алқа» төсбелгісі табысталды.
Қала әкімі марапат иелерін құттықтап, отбасы құндылықтарын сақтауда, ұрпақ тәрбиесінде аналардың еңбегі айрықша екенін атап өтті.
– «Ана бір қолымен бесікті тербетсе, екінші қолымен әлемді тербетеді» деген жақсы сөз бар. Сіздер – отбасының берекесін ұйытып, ұлттың ұрпағын тәрбиелеп отырған ардақты жандарсыздар. Еңбектеріңіз әрдайым елдің құрметіне лайық. Сіздерге зор денсаулық, отбасыларыңызға амандық, мол бақыт және қажымас қайрат тілеймін. Марапаттарыңыз құтты болсын! – деді қала әкімі Мақсат Мұқаш.
Өз кезегінде алтын құрсақты аналар көрсетілген құрмет пен қолдау үшін алғыстарын білдірді.
Ақтау қаласы әкімінің баспасөз қызметі
