Атырау облысы Ішкі саясат басқармасы басшысының орынбасары лауазымына Досқалиева Жаннат Закиқызы тағайындалды.
Досқалиева Жаннат Закиқызы 1980 жылғы 22 қыркүйекте Атырау қаласында дүниеге келген. 1997–2001 жылдары Х.Досмұхамедов атындағы Атырау мемлекеттік университетінде білім алып, «Басқа ұлт мектептеріндегі қазақ тілі мен әдебиеті пәнінің мұғалімі» мамандығын меңгерген. 2010–2012 жылдары Еуразия академиясын «Құқықтану» мамандығы бойынша тәмамдаған.
Еңбек жолын 2001 жылы Ы.Алтынсарин атындағы орта мектепте қазақ тілі мен әдебиеті пәнінің мұғалімі болып бастаған.
2001–2006 жылдары Ы.Алтынсарин атындағы орта мектепте қазақ тілі мен әдебиеті пәнінің мұғалімі, 2006–2008 жылдары Атырау қалалық ішкі саясат бөлімінің жетекші маманы, 2008–2012 жылдары аталған бөлімнің бас маманы қызметтерін атқарған.
2012 жылы Атырау қалалық ішкі саясат бөлімінің саяси партиялармен, діни бірлестіктермен, үкіметтік емес ұйымдармен және жастармен жұмыс жөніндегі сектор меңгерушісі, 2012–2016 жылдары осы бөлімнің басшысы болған.
2016–2018 жылдары Қ.Дүтбаева атындағы гуманитарлық колледж директорының оқу-тәрбие жұмысы жөніндегі орынбасары, 2018–2020 жылдары Атырау облысы әкімі аппаратының «Қоғамдық келісім» коммуналдық мемлекеттік мекемесінің басшысы қызметтерін атқарған.
2021–2026 жылдары Атырау облысы Ішкі саясат басқармасының «Азаматтық орталығы» коммуналдық мемлекеттік мекемесін басқарған.
2026 жылдың қазан айынан бастап Атырау облысы Ішкі саясат басқармасы басшысының орынбасары лауазымына тағайындалды.
