Абай облысында полицейлер жол қауіпсіздігіне қатер төндірген жүргізушінің жолын кесті.
Оқиға түнгі сағат 03:45 шамасында Шығыс кентінде болған. Патрульдік полиция қызметкерлері жол бойында күдік тудырған Toyota Carina автокөлігін байқап, оны жедел түрде тоқтатты.
Жүргізушімен әңгімелесу барысында полицейлер оның жүріс-тұрысынан масаңдық белгілерін байқап, медициналық куәландырудан өткізді. Сараптама нәтижесінде 34 жастағы жүргізушінің алкогольдік ішімдік ішкені және жеңіл дәрежедегі масаң күйде болғаны анықталды.
Кез-келген уақытта көлік тізгініне мас күйде отыру — тек жүргізушінің өз өміріне емес, жол қозғалысына қатысушылардың барлығына тікелей қауіп төндіретін жауапсыз әрекет. Бір сәттік немқұрайлылықтың соңы орны толмас өкінішке әкелуі мүмкін.
Жолдағы қауіпсіздік — әр адамның жауапкершілігінен басталады. Көлік жүргізушілерін алкоголь ішкеннен кейін рөлге отырмауға, өз өмірі мен өзгенің өмірін қатерге тікпеуге шақырамыз.
