Астана қаласы бойынша Мемлекеттік кірістер департаменті

ҚҚС бойынша тіркеу есебіне міндетті түрде қою шегі тиісті қаржы жылының 1 қаңтарына қолданыстағы 10 000 АЕК мөлшерін құрайды. Шектен асқан жағдайда салықтық өтініш шектен асқан күннен бастап 5 жұмыс күнінен кешіктірмей беріледі.

Арнайы салық режимдерін, оның ішінде оңайлатылған декларация негізіндегі арнайы салық режимін қолданатын салық төлеушілер үшін ҚҚС бойынша міндетті тіркеу есебіне қоюдан босату көзделген.

Кірістер мен мүлік туралы декларацияны мына тұлғалар тапсырады: 1) "Сыбайлас жемқорлыққа қарсы іс-қимыл туралы", "Қазақстан Республикасындағы банктер және банк қызметі туралы", "Сақтандыру қызметі туралы", "Бағалы қағаздар рыногы туралы" Қазақстан Республикасының заңдарына сәйкес кірістер мен мүлік туралы декларацияны ұсыну жөніндегі міндет жүктелген тұлғалар; 2) коммерциялық емес ұйымдардың құрылтайшыларын (қатысушыларын) қоспағанда, квазимемлекеттік сектор субъектілерінің, жарғылық капиталындағы үлестің (акционерлік қоғам акцияларының) 10 пайызынан астамын иеленетін заңды тұлғалардың басшылары, құрылтайшылары (қатысушылары), сондай-ақ олардың резидент-жұбайлары (зайыптары); 3) кәсіпкерлік қызметтен түскен кірістерді қоспағанда, жеке тұлғаның дербес салық салуына жататын кірісті алған жеке тұлғалар; 4) есепті салықтық кезеңнің 31 желтоқсанындағы жағдай бойынша Қазақстан Республикасының шегінен тысқары жерде орналасқан шетелдік банктердің банк шоттарында жиынтығында айлық есептік көрсеткіштің 1 000 еселенген мөлшерінен асатын сомада ақшасы бар жеке тұлғалар; 5) есепті салықтық кезеңнің 31 желтоқсанындағы жағдай бойынша меншік құқығында мынадай мүлкі: мемлекеттік немесе өзге де тіркеуге (есепке алуға) жататын мүлік не шет мемлекеттің заңнамасына сәйкес шет мемлекеттің құзыретті органында мемлекеттік немесе өзге де тіркеуге (есепке алуға) жататын құқықтар және (немесе) мәмілелер; эмитенттері Қазақстан Республикасының шегінен тысқары жерде тіркелген бағалы қағаздар; Қазақстан Республикасының шегінен тысқары жерде тіркелген заңды тұлғаның жарғылық капиталына қатысу үлесі; Қазақстан Республикасының шегінен тысқары жерде тіркелген зияткерлік меншік, авторлық құқық объектілері; инвестициялық алтыны бар жеке тұлғалар; 6) есепті салықтық кезең ішінде Қазақстан Республикасында және (немесе) оның шегінен тысқары жерде есепті салықтық кезеңнің 31 желтоқсанына қолданыста болатын жиынтық құны айлық есептік көрсеткіштің 20 000 еселенген мөлшерінен асатын мүлікті: мемлекеттік немесе өзге де тіркеуге жататын жылжымайтын мүлікті, сондай-ақ құқықтары және (немесе) мәмілелері мемлекеттік немесе өзге де тіркеуге жататын мүлікті; мемлекеттік тіркеуге жататын механикалық көлік құралдары мен тіркемелерді; заңды тұлғаның жарғылық капиталына қатысу үлесін; бағалы қағаздарды; туынды қаржы құралдарын (орындалуы базалық активті сатып алу немесе өткізу жолымен болатын туынды қаржы құралдарын қоспағанда); тұрғын үй құрылысына қатысу үлестерін; инвестициялық алтынды сатып алған адамдар. Мүліктің жиынтық құны есепті салықтық кезең ішінде оны сатып алу бағаларын жинақтау арқылы айқындалады. 7) есепті салықтық кезеңнің 31 желтоқсанындағы жағдай бойынша меншігінде цифрлық активтері бар адамдар; 8) осы Кодекстің 363-бабының 1) тармақшасында көзделген кестенің 2-жолында көрсетілген жеке табыс салығының мөлшерлемесі қолданылған жалғыз кіріс көзі болып табылатын, төлем көзінен салық салуға жататын жұмыскердің кірісін алғандарды қоспағанда, осы Кодекстің 363-бабының 1) тармақшасында көрсетілген, оның ішінде Қазақстан Республикасының шегінен тысқары жерде есепті салықтық кезең үшін салықтық кезеңнің 31 желтоқсанына қолданыста болатын айлық есептік көрсеткіштің 8 500 еселенген мөлшерінен асатын сомада кірістер алған жеке тұлғалар; 9) есепті салықтық кезең үшін, оның ішінде Қазақстан Республикасының шегінен тысқары жерде есепті салықтық кезеңнің 31 желтоқсанына қолданылатын 230 000 еселенген айлық есептік көрсеткіштен асатын сомада дивидендтер түрінде кіріс алған жеке тұлғалар.

2026 жылдан бастап базалық салықтық шегерім айына 30 АЕК құрайды. Күнтізбелік жыл үшін базалық салықтық шегерімнің жалпы сомасы 360 АЕК-тен аспауға тиіс.

Декларацияны белгіленген мерзімде ұсынбағаны үшін (ҚР ӘҚБтК-нің 272-бабы): -бірінші рет жасалған құқық бұзушылық – ескерту; -бір жыл ішінде қайталап жасалған құқық бұзушылық – 15 АЕК мөлшерінде айыппұл. Салықтардың төмендетілуіне әкеп соқпаған толық емес/дұрыс емес мәліметтерді ұсынғаны үшін (ҚР ӘҚБтК-нің 272-бабы): -бірінші рет жасалған құқық бұзушылық – ескерту; -бір жыл ішінде қайталап жасалған құқық бұзушылық – 3 АЕК мөлшерінде айыппұл. Салық салуға жататын мүлікті немесе кірістерді, оның ішінде шетелдегі мүлік пен кірістерді жасырғаны үшін (ҚР ӘҚБтК-нің 275-бабы): -бірінші рет жасалған құқық бұзушылық – төленбеген салық сомасының 200%-ы мөлшерінде айыппұл; -қайталап жасалған құқық бұзушылық – 300% мөлшерінде айыппұл. Декларацияларды ұсыну мерзімдері: 250.00 нысаны – декларация тапсыру міндеттемесі туындаған жылдың 15 қыркүйегінен кешіктірмей; 270.00 нысаны – есепті жылдан кейінгі жылдың 15 қыркүйегінен кешіктірмей.

Қазақстан Республикасының «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңына сәйкес сот арқылы банкроттық рәсімі борышкердің мүлкі болған жағдайда немесе екінші деңгейлі банктерге, микрокаржы ұйымдарына, коллекторлық агенттіктерге, сондай-ақ банк қарызы, қарыз (кредит) шарттары және жеке тұлғаларға микрокредит беру шарттары бойынша талап ету құқықтары бар өзге ұйымдар алдындағы берешек 1600 АЕК-тен асқан жағдайда қолданылады, сондай-ақ басқа тұлғалар алдындағы міндеттемелер бойынша қарыз сомасына қарамастан қолданылады. Сонымен қатар, сот арқылы банкроттық рәсімін қолданудың міндетті шарттары: қарыздың 12 ай ішінде өтелмеуі; міндеттемелер бойынша реттеу рәсімінен өту. (Заңның 6-бабы 2-тармағы) Азамат сотқа сот арқылы банкроттық рәсімін қолдану туралы өтінішті тұрғылықты жері бойынша береді (20-бап 2-тармақ). Осылайша, егер борышкердің 12 ай ішінде өтелмеген міндеттемелері екінші деңгейлі банк, микрокаржы ұйымы немесе коллекторлық агенттік болып табылмайтын заңды тұлға алдында болса, ол қарыз сомасына қарамастан сот арқылы банкроттық рәсімін қолдануға өтініш бере алады.