Арнайы кедендік рәсім: негізгі аспектілер
Жекелеген санаттағы тауарларды Еуразиялық экономикалық одақтың (ЕАЭО) шекарасы арқылы өткізу құқықтық реттеуді Қазақстан Республикасының «Қазақстан Республикасындағы кедендік реттеу туралы» кодексінің 38-тарауындағы 336-бабына сәйкес жүзеге асырылады.
Рәсімнің мәні неде?
ҚР Кодексінің 336-бабының 1-тармағына сәйкес, бұл рәсім белгіленген талаптарды сақтаған жағдайда шетелдік тауарлар мен ЕАЭО тауарларын кедендік аумақта (немесе оның шегінен тыс) кедендік баждарды, салықтарды, сондай-ақ арнайы, демпингке қарсы және өтемақы баждарын төлемей өткізуге, орналастыруға және пайдалануға мүмкіндік береді.
Рәсім қандай тауарларға қатысты қолданылады?
ҚР Кодексінің 336-бабының 2-тармағына сәйкес, арнайы рәсім мынадай негізгі санаттарға қолданылады:
Дипломатиялық сала:
Қазақстан Республикасының және шет мемлекеттердің дипломатиялық өкілдіктерінің, консулдықтарының және ресми миссияларының қызметін қамтамасыз етуге арналған тауарлар.
Консулдық мекемелерге арналған мемлекеттік рәміздер, маңдайшалар, мөрлер, ресми баспа материалдары және кеңсе керек-жарақтары.
Қорғаныс және қауіпсіздік:
ЕАЭО-ға мүше мемлекеттердің әскери бөлімдерінің жауынгерлік әзірлігін қамтамасыз етуге арналған қару-жарақ, әскери техника және материалдық құралдар.
Бірлескен халықаралық оқу-жаттығуларға, жарыстарға және шерулерге қатысу үшін өткізілетін техника мен жабдықтар.
Төтенше жағдайлар:
Төтенше жағдайлардың алдын алуға және олардың салдарын жоюға арналған тауарлар мен көлік құралдары, оның ішінде зардап шеккендерге көрсетілетін гуманитарлық көмек, авариялық-құтқару қызметтері мен медициналық құралымдарға арналған жабдықтар.
Ғылым және ғарышты игеру:
ЕАЭО-ның Арктика мен Антарктикадағы коммерциялық емес негізде жүргізілетін ғылыми-зерттеу жұмыстарына арналған материалдар.
Ғарыш кеңістігін зерттеу және игеру саласындағы халықаралық ынтымақтастық шеңберінде пайдалануға арналған тауарлар.
Спорт және медицина:
Допинг-бақылау мақсаттарына арналған тауарлар.
Ұлттық құрама командаларының мүшелеріне емдеу және оңалту іс-шараларын өткізуге арналған дәрілік заттар, арнайы тағам өнімдері және ББҚ.
Ресми халықаралық жарыстарды өткізуге және оларға дайындалуға арналған спорттық жабдықтар мен жарақтар.
Халықаралық жобалар және инфрақұрылым:
Ресми халықаралық көрмелерді ұйымдастыруға және өткізуге арналған тауарлар.
Қазақстан Республикасының айрықша юрисдикциясындағы жасанды аралдар мен құрылыстарды салуға және пайдалануға арналған жабдықтар.
Маңызды: ҚР Кодексінің 336-бабының 3-тармағына сәйкес, Еуразиялық экономикалық комиссия осы рәсім қолданылатын тауарлардың өзге де санаттарын айқындауға құқылы.
