Талдықорған қаласында Жетісу облысы әкімінің жыл сайынғы «Көшбасшы – 2026» жастар сыйлығының лауреаттарын салтанатты марапаттау рәсімі өтті.
Салтанатты шарада Жетісу облысы Полиция департаментінің аға инспекторы Жақсылық Сәрсеновке ерекше құрмет көрсетілді. Ол «Үздік жас қаһарман» номинациясының жеңімпазы атанды.
Облыс әкімі атынан Жақсылық Сәрсеновті облыс әкімінің орынбасары Диас Есдәулетов құттықтап, полиция қызметкерінің батылдығы мен жанқиярлығын атап өтті. Марапат Талдықорған тұрғындарының алдында табысталды.
15 маусым күні Алакөлде қатты жел мен толқын кезінде Жақсылық Сәрсенов жағадан алысқа кетіп қалған төрт демалушыны құтқарып, олардың өміріне араша түсті.
Полиция қызметкерінің өзі бұл әрекетін ерлік деп санамайды:
«Менің басты міндетім – халыққа қызмет ету және олардың қауіпсіздігін қамтамасыз ету».
Лайықты марапат полиция қызметкерінің батылдығы мен жанқиярлығының жарқын көрінісі болды.
Жақсылық Сәрсеновтің оқиғасы – полиция қызметі тек форма мен шеннен тұрмайтынын, ең алдымен адам өміріне қауіп төнген сәтте көмекке келуге әрдайым дайын болу екенін көрсетеді.
Халыққа қызмет ету. Қорғау. Құтқару. Полиция қызметкерінің нағыз күші – осында.
