2026/27 жылғы маусымдағы конькимен жүгіруден Әлем кубогының алғашқы кезеңі 13-15 қараша аралығында Қытайдың Бейжің қаласында басталады. Қазақстан ұлттық құрамасы сапында Қостанай облысының үш үздік спортшысы жарыс жолына шығады.
Халықаралық беделді жарыстарда өңіріміз бен еліміздің намысын төмендегі спортшылар қорғайды:
Мария Деген – әйелдер құрамасының негізгі спортшыларының бірі. Жоғары спорт шеберлігі мектебінің (ЖСШМ) түлегі, республикалық біріншіліктердің бірнеше дүркін жүлдегері.
Никита Важенин – Әлем кубогы кезеңдерінің күміс жүлдегері атанған тәжірибелі спортшы. Ол биылғы маусымдағы ішкі жарыстарда да жоғары деңгейін дәлелдеді.
Вадим Якубовский – Қазақстанның стайерлік қашықтықтардағы сөзсіз көшбасшысы. Қазан айында өткен Қазақстан чемпионатында Вадим 5000 және 10 000 метр қашықтықтарда топ жарып, қос алтын медаль жеңіп алды.
Қостанайлық спортшылар үшін бұл жарыстар маусымның басты халықаралық додаларына қатысу квоталарын сарапқа салу тұрғысынан аса маңызды.
Бейжіңдегі жарыстар аяқталған соң, қостанайлық спортшылар ұлттық құрама сапында Жапонияға аттанады. Әлем кубогының екінші кезеңі 20-22 қараша аралығында Обихиро қаласында өтеді.
Қостанайдың конькимен жүгіру мектебінің спортшыларына сәттілік тілейміз! Жерлестерімізден жаңа рекордтар мен жүлделі орындар күтеміз!
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
