ШҚО-да бір апта ішінде табиғатты қорғау заңнамасын бұзудың 45 фактісі анықталды
Заңсыз аң аулау, балық аулау және ағаштарды кесу – Шығыс Қазақстан облысының полицейлері «Браконьер» жедел профилактикалық іс-шарасы аясында анықтап жатқан құқық бұзушылықтар.
Іс-шараның негізгі мақсаты – өңірдің жануарлар мен өсімдіктер дүниесін қорғау, жануарлар мен балықтарды заңсыз аулауға жол бермеу, сондай-ақ орман қорын сақтау.
Алғашқы аптаның өзінде полицейлер 45 құқық бұзушылықты анықтады. Оның 27-сі аң аулау қағидаларын бұзуға, 17-сі балық аулау қағидаларын бұзуға қатысты. Тағы бір дерек ағаштар мен бұталарды заңсыз кесу, жою немесе зақымдауға байланысты тіркелді.
Барлық дерек бойынша заңнамаға сәйкес шаралар қабылданды. Құқық бұзушылар ҚР ӘҚБтК-нің 382, 383 және 381-1-баптары бойынша әкімшілік жауапкершілікке тартылды.
Тексерулер заңсыз аң аулау мен балық аулау орын алуы мүмкін аумақтарда, сондай-ақ басқа да табиғи аймақтарда жүргізілуде. Полицейлер құқық бұзушылықтарды анықтаумен қатар, азаматтарға аң аулау және балық аулау қағидаларын түсіндіріп, табиғатқа ұқыпты қараудың маңызын еске салады.
«Браконьер» жедел профилактикалық іс-шарасы жалғасуда. Полиция облыс тұрғындары мен қонақтарын табиғатты қорғау заңнамасын сақтауға шақырады. Өйткені туған өлкенің табиғи байлығын сақтау – баршамызға ортақ міндет.
ШҚО ПД баспасөз қызметі
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
